यो देशलाई सुधारूँ

छन्द- मालिनी 
सुमधुर लय भाका गीत यौटा म गाऊँ । 
रसिक दिल बनई काव्य धारा बगाऊँ ॥ 
प्रगतिपथ समाई भाव नौलो फिजारूँ ।
असल मन लिई यो देशलाई सुधारूँँ ॥
(१)
गलत लत हटाई स्वच्छ माया लगाँऊ ।
सफल फल उठाई भावलाई जगाऊँ ॥
सबलपन लिएका व्यक्तिलाई उताारूँ ।
असल मन लिई यो देशलाई सुधारूँँ ॥
(२)
गलित रहिरहने बाध्यतामा परेका ।
 गरिब जन सयौ छन् भोकभोकै मरेका ॥
अलमल नगरेरै कष्ट बाधा म टारूँ ।
असल मन लिई यो देशलाई सुधारूँ ॥
(३)
दुखित मनुज आफनो दुःख फोईरहेको ।
अझ कति दिन हेर्ने देश रोईरहेको ॥
हर समय सुनौला कर्म के हो विचारूँ ।
असल मन लिई यो देशलाई सुधारूँ ॥
(४) 
उठ उठ नव आस्था जोशका साथ भर्न ।
जगतभर सबैमा सत्य सन्देश छर्न ॥
युगयुग बलिया ती दिव्य शक्ति फिजारूँ ।
असल मन लिई यो देशलाई सुधारूँ ॥
(५)

पोखरा