भुटानको गेलेफुस्थित शिवालय मन्दिरका लागि विश्वभरका श्रद्धालुलाई आर्थिक सहयोग गर्न आह्वान

२ असोज, झापा । भुटानको गेलेफु माइन्डफुलनेस सिटी (Gelephu Mindfulness City) स्थित शिवालय यज्ञेश्वर महादेव मन्दिरलाई स्वर्णमय बनाउने कार्य तीव्र रूपमा अघि बढिरहेको छ । भगवान् शिवप्रति आस्था राख्ने श्रद्धालु, विभिन्न संस्था तथा शुभेच्छुकहरूको सहभागितामा सञ्चालन भइरहेको यस अभियानमा भुटानसहित अन्तर्राष्ट्रिय समुदायबाट समेत आर्थिक सहयोग र सुन चढाउने क्रम जारी छ।

भुटानको गेलेफुमा रहेको यस मन्दिरलाई सुनले सजाउने अभियान ७ सेप्टेम्बर २०२६ मा सुरु गरिएको थियो। भुटानका राजा जिग्मे खेसर नाम्ग्याल वाङ्चुकको निर्देशनअनुसार मन्दिरको शिखर, बाहिरी संरचना तथा पवित्र भागहरूमा सुनको आवरण लगाउने कार्य अघि बढाइएको हो । सन् २०१८ मा निर्माण सम्पन्न भएको यो मन्दिर गेलेफु तथा आसपासका हिन्दू समुदायका लागि महत्त्वपूर्ण धार्मिक आस्थाको केन्द्र रहँदै आएको छ।

भुटानी समाचार संस्था कुएन्सेलमा ९ अक्टोबरमा प्रकाशित विवरणअनुसार, ६ अक्टोबर २०२६ सम्म यस अभियानमा ७० लाख ९८ हजार ९८२.४८ भुटानी न्गुल्ट्रम नगद तथा ६.९२५ ग्राम सुन सङ्कलन भइसकेको थियो। उक्त समयमा १,७७१ जना दाताले योगदान दिएका थिए। अभियान सुरु भएको पहिलो दिनमै १६ लाख न्गुल्ट्रमभन्दा बढी सहयोग प्राप्त भएको थियो।

यस अभियानमा भुटानभित्रका श्रद्धालु तथा दाताहरूका अतिरिक्त विदेशमा रहेका व्यक्ति र संस्थाहरूलाई पनि सहभागी हुन आह्वान गरिएको छ। अन्तर्राष्ट्रिय दाताहरूले आधिकारिक अनलाइन प्लेटफर्ममार्फत Visa वा Mastercard प्रयोग गरी आर्थिक सहयोग गर्न सक्ने व्यवस्था गरिएको छ। भुटानभित्रका दाताहरूले Bank of Bhutan को mBoB मोबाइल बेङ्किङ प्रणालीमार्फत पनि योगदान दिन सक्छन्।

यस अभियानको आधिकारिक अनलाइन पोर्टल www.goldenmandir.bt रहेको छ। अभियानबाट प्राप्त रकम मन्दिरका लागि छुट्टै राखिएको Bank of Bhutan को खातामा जम्मा गरिने जानकारी सार्वजनिक गरिएको छ। इच्छुक व्यक्तिहरूले आर्थिक सहयोगका अतिरिक्त सुनसमेत अर्पण गर्न सक्ने व्यवस्था छ।

मन्दिरलाई स्वर्णमय बनाउने कार्य ३१ अक्टोबर २०२६ सम्म पूरा गर्ने लक्ष्य राखिएको छ। त्यसपछि १ नोभेम्बरमा विशेष कार्यक्रम आयोजना गरी भारतका गृहमन्त्री अमित शाह र अन्य प्राय एक लाख  श्रद्धालुहरूको उपस्थितिमा सो मन्दिर उद्घाटन हुने समाचार छ। सोही दिन गेलेफु माइन्डफुलनेस सिटीमा १०८ वटा जाङ्चुब छोर्टेन (बौद्ध स्तूप) निर्माणसम्बन्धी विशेष कार्यक्रम पनि आयोजना गर्ने योजना रहेको सुनिएको छ। यसले गेलेफुलाई धार्मिक, सांस्कृतिक तथा आध्यात्मिक गतिविधिको महत्त्वपूर्ण केन्द्रका रूपमा स्थापित गर्ने अपेक्षा गरिएको छ।

मन्दिरमा संरचनागत सुधार तथा सुनको आवरण लगाउने कार्य भइरहेकाले ३१ अक्टोबर २०२६ सम्म सर्वसाधारणका लागि प्रवेश निषेध गरिएको जनाइएको छ। यस ऐतिहासिक अभियानले धार्मिक आस्था, सांस्कृतिक सहअस्तित्व र सामुदायिक सहभागिताको महत्त्वपूर्ण सन्देश प्रवाह गरेको छ।

भगवान् शिवप्रति श्रद्धा राख्ने विश्वभरका नेपालीभाषी, भारतीय, भुटानी तथा अन्य समुदायका श्रद्धालुहरूले आधिकारिक माध्यमबाट ३१ अक्टोबर २०२६ भित्र आर्थिक योगदान गरी यस ऐतिहासिक पहलमा सहभागी हुन सक्नेछन्। यो आर्थिक सहयोग केवल मन्दिरको विकासमा योगदान मात्र नभई भावी पुस्ताका लागि धार्मिक तथा सांस्कृतिक सम्पदाको संरक्षणमा सहभागी हुने अवसर पनि हो।

योगदान गर्दा सन्देश लेख्ने स्थानमा शिष्ट र भावपूर्ण शब्दहरूमा आफ्नो श्रद्धा, शुभकामना तथा समर्थन व्यक्त गर्नु उपयुक्त हुनेछ। त्यहाँ अभिलिखित सन्देश सम्बन्धित अधिकारीहरू हुँदै भुटानका सम्माननीय नरेशसम्म पनि पुग्न सक्ने सम्भावना रहन्छ। यसलाई केवल आर्थिक सहयोगका रूपमा मात्र नहेरी सद्भाव र आपसी समझदारीको अभिव्यक्तिका रूपमा लिन सकिन्छ।

यो परियोजना भुटानका नरेशको पहलसँग सम्बन्धित भएकाले यसमा श्रद्धापूर्वक सहभागिता जनाउनु नेपाल, भारत, भुटान तथा विश्वभर छरिएका नेपालीभाषी समुदायबीच सांस्कृतिक सम्बन्ध र आत्मीयता अझ प्रगाढ बनाउने एउटा माध्यम बन्न सक्छ। आजको यो सानो सद्भावपूर्ण पहल भविष्यमा समुदायहरूबीच विश्वास, संवाद र सहकार्यको एउटा प्रतीकात्मक ‘पुल’ साबित हुन सक्नेछ।

वैश्विक आर्थिक सहयोगका लागि आधिकारिक लिङ्क: https://www.goldenmandir.bt

स्रोत: Kuensel, Asia News Network तथा Bhutan Broadcasting Service (BBS) मा प्रकाशित समाचारहरू।

प्रेषक- डा खगेन शर्मा, गुवाहाटी

16 अक्टोबर 2026