सपना

सपनामा देखिने 
सपनाहरू सबै पूरा हुने भए 
सायद त्यो सपना हुने थिएन 
त्यसलाई बिपना भनिने थियो
त्यसैले  
सपना सपना नै हो
बिपना होइन
मैले
दिउँसो देखिने सपना 
सपना मात्र भएको देखेको छु 
कहिले 
कल्पना मात्र भएको देखेको छु 
अनि भावना भएर 
आफैलाई सताएको पनि देखेको छु 
सपनाको पनि 
कुनै टुङ्गो नहुँदो रहेछ 

कठै !
हजारौं सपनाहरू 
पूरा नहुँदै तुहिएको देखेको छु 
सपना देख्नेहरू
सपनासंगै जोडिएर 
हाँस्दा हाँस्दै रोएको देखेको छु  
देख्न त
कयौं सपना पूरा हुँदा 
रुँदारुँदै हाँसेको पनि देखेको छु
संसार जितेको पनि देखेको छु 
सायद सबैको सपना पूरा हुँदो हो त 
त्यो सपना
सपना मात्र हुने थिएन 
यथार्थ हुने थियो 
सायद संसार यस्तो हुने थिएन 
सबैले आफूले चाहे जस्तै 
संसार बनाउने थिए
खुशीमा झुमेर 
खुट्टाले भुइँ छाड्ने थिए 
सायद 
नाच्नलाई आँगन चाहिने थिएन 
म जस्ता हजारौं सपना देख्नेहरुको 
हजार सपनाहरू बेकार हुने थिएनन् 
सपना, सपना मात्र हुने थिएन 
तर 
सपना सपना नै हो 
बिपना होइन 
तर पनि 
सपना देख्न छोड्नु हुन्न 
नसुतेर नै सही 
सपना भनेको आशा हो 
सपना भनेको बाँच्ने आधार हो 
सपना भनेको 
पूरा नहुँदा सपना हो 
पूरा हुँदा आफ्नो सफलता हो ।