कलियुगका कृष्णहरू र प्रश्नहरू
सुन्न सक्छौ प्रश्नहरू
छौ यदि कतै भने
कलियुगका कृष्णहरू
छौ चुपचाप किन?
द्रौपदीको चीरहरणमा
कलियुगका भीष्मपितामहहरू पनि
कुर्लिने हुन् अझै कति
बस्तीका महलहरूमा
कपटी शकुनि र महत्वाकांक्षी धृतराष्ट्रहरू
अहो ! खुलेआम अझै कति
नङ्ग्याइरहने हुन् लाज
अभिमानी दुर्योधन र नकचरा दुशासनहरू ।
कहिलेसम्म थापिरहने हुन्
चेलीबेटी बेचबिखनका पसल
कलियुगका दानवीर कणर्हरू अनि
कहिलेसम्म झुमिरहने हुन् ?
दुर्व्यसनीको चक्रव्यूहमा
कलिला अभिमन्युहरू पनि ।
विवेक र स्वाभिमान
दाउ लगाउँदैछन् किन ?
उल्टो यो युगका युधिष्ठिरहरू
फरकफरक मूल्यमा
फरकफरक स्वादमा
भोग्दैछन् फरकफरक द्रौपदीहरु
वेबसाइटका भित्ताहरू
र सहरका गल्लीगल्लीहरूमा
खोज्दैछन् सेक्सी गर्ल किन?
बिचरा युधिष्ठिरका अनुजहरू
मर्यादाका साङ्लाहरूभित्र
कतिदिन थुनिएलान् अब
माता गान्धारी र कुन्तीहरू ?
नीतिशास्त्रका हरफहरू भित्र
कतिदिन चल्लान्
बिचरा नीतिवान् विदुरहरू
के अझै
सत्यता र आदर्शको
पाठ सिकाइरहनन् कलियुगका
कृपाचार्य र द्रोणाचार्यहरू ?
आकाश, पृथ्वी, जल
वायु र तेज गर्दैछन् प्रश्न
के अब अर्को महाभारत
रोक्न सक्छन्
कलियुगका कृष्णहरू ?
