सामाजिक विकास समाजद्वारा १८ कानुनविदहरु सम्मानित
२०८३ कात्तिक २५, झापा ।
शुभ दीपावली, नेपाल सम्बत तथा छठ पर्वको पावन अवसरमा सामाजिक विकास समाज, अनामनगर, काठमाडौंले शुभकामना आदानप्रदान तथा सम्मान कार्यक्रम सम्पन्न गरेको छ ।
समाजका अध्यक्ष ओम उप्रेतीको सभापतित्व तथा बागमती प्रदेशका पूर्व पर्यटन तथा संस्कृति मन्त्री माननीय दीपेन्द्र श्रेष्ठको प्रमुख आतिथ्यतामा सम्पन्न उक्त कार्यक्रममा समाजको उद्देश्य, आदर्श र अभियानलाई सार्थक तुल्याउन कानुनी क्षेत्रबाट अतुलनीय सहयोग, महत्वपूर्ण योगदान, निःस्वार्थ सेवा तथा संस्थागत हितप्रतिको समर्पणको लागि डेढ दर्जन कानुनविदलाई सम्मान गरिएको थियो ।
यसैगरी अधिवक्ताहरुमा क्रमशः प्रा.डा. लक्ष्मीप्रसाद मैनाली, शंकर सुवेदी, विमल सुवेदी, हरि फुयाल, केदारप्रसाद दाहाल, बाबुराम दाहाल, सतिशकुमार झा, गुरुभक्त निरौला र रक्ष रैका मगर रहनु भएको
छ ।
उहाँहरुलाई प्रमुख अतिथि श्रेष्ठ, अध्यक्ष उप्रेती, माननीय शान्ता ढकाल, पूर्व सचिव माधव रेग्मी र पूर्व न्यायधीश युवराज सुवेदीलगायतले सम्मान गर्नु भएको थियो ।
कार्यक्रममा प्रमुख अतिथि श्रेष्ठ, सभापति उप्रेती, वरिष्ठ इतिहासविद सुरेन्द्र केसी., पूर्व सचिव एवं लोकसेवा आयोगका पूर्व अध्यक्ष माधव रेग्मी, समाजका संरक्षक पूर्व न्यायधीश युवराज सुवेदीलगायतले आआफ्नो शुभकामना मन्तव्य राख्नु भएको थियो भने सम्मानितहरुको तर्फबाट अधिवक्ता शंकर सुवेदीले मन्तव्य राख्दै सम्मानको लागि आभार व्यक्त गर्नु भएको थियो ।
कार्यक्रमको सहजीकरण समाजका महासचिव रक्ष रैका मगरले गर्नु भएको समाचार पत्रकार महासंघ नेपालका अध्यक्ष राधेश्याम लेकालीबाट प्राप्त भएको छ ।
