झापा नाटक घरमा ‘बसाइँ’ नाटकको सिजन–२ सुरु हुने

दर्शकको माग र विद्यालयहरूको अग्रिम बुकिङपछि झापा नाटक घरमा ‘बसाइँ’ नाटकको सिजन–२ पनि सुरु हुने भएको छ । 

 बहुजातीय सांस्कृतिक संग्रहालयसहितको झापा नाटक घर निर्माण सहयोगार्थ क्षितिज नाट्य प्रतिष्ठान नेपालद्वारा निर्मित झापा नाटक घरमा मञ्चन भइरहेको चर्चित नाटक ‘बसाइँ’ दर्शकको उत्साहजनक सहभागिता र मागका कारण पुनः मंसिर ७ देखि मञ्चन हुने भएको हो ।

वरिष्ठ साहित्यकार लीलबहादुर क्षेत्रीद्वारा लिखित चर्चित उपन्यास ‘बसाइँ’ मा आधारित नाटक गत कार्तिक १४ गतेदेखि २१ गतेसम्म पहिलो चरणमा मञ्चन गरिएको थियो। दर्शक, विद्यार्थी तथा विभिन्न विद्यालयहरूको अग्रिम बुकिङ र निरन्तरको मागलाई मध्यनजर गर्दै आगामी मंसिर ७ गतेदेखि १६ गतेसम्म नाटकको दोस्रो चरण अर्थात् ‘सिजन–२’ मञ्चन गर्न लागिएको हो।

क्षितिज नाट्य प्रतिष्ठान नेपालका केन्द्रीय अध्यक्ष तथा नाटकका निर्माण परिकल्पनाकार माधव कल्पितले दर्शकको उल्लेखनीय उपस्थिति, विद्यालयहरूको चासो र अग्रिम बुकिङका कारण पुनः मञ्चन गर्न लागिएको जानकारी दिनुभयो। उहाँका अनुसार नाटकमार्फत झापा नाटक घर निर्माण तथा बहुजातीय सांस्कृतिक संग्रहालय स्थापनाको अभियानलाई समेत सहयोग पुग्ने अपेक्षा गरिएको छ।

प्रतिष्ठानका महासचिव गजेन्द्र खतिवडा ‘पृथक’ को नाट्य रूपान्तरण तथा निर्देशन र सचिव राजकुमार भट्टराईको व्यवस्थापनमा तयार भएको नाटकमा पूर्णिमा विश्वकर्मा, राकेश दर्नाल, पारस तामाङ, विवेक मिश्र, प्रज्वल भट्टराई, दिलकुमार लिम्बू, बालकलाकार आशुतोष भट्टराई, दीपा शिवाकोटी, आर्जु पौड्याल, राजकुमार भट्टराई, सीताराम भट्टराईलगायत कलाकारहरूको जीवन्त अभिनय रहेको छ।

६६ जिल्लाका दर्शकहरूको उपस्थितिमा उद्घाटन गरिएको नाटक ‘बसाइँ’ ले नेपाली समाजको गरिबी, अभाव, शोषण, विस्थापन र बाध्यतापूर्ण बसाइँसराइको पीडालाई जीवन्त रूपमा प्रस्तुत गरेको छ। नाटकले दर्शकको मन छुने र भावविह्वल बनाउने सामर्थ्य राखेको प्रतिष्ठानका साहित्य विभाग अध्यक्ष तुलसीप्रसाद भट्टराईले बताउनुभयो।

नाटक अवलोकनका लागि आम दर्शकलाई २०० रुपैयाँ र विद्यार्थीलाई १०० रुपैयाँ टिकट शुल्क निर्धारण गरिएको छ। हालसम्म १५ वटा विद्यालयले नाटक अवलोकनका लागि अग्रिम बुकिङ गरिसकेको अध्यक्ष कल्पितले जानकारी दिनुभयो।

झापा नाटक घरलाई पूर्णता दिने तथा बहुजातीय सांस्कृतिक संग्रहालय निर्माण गर्ने उद्देश्यसहित सञ्चालन भइरहेको यस अभियानमा नाटक ‘बसाइँ’ केवल मनोरञ्जनको माध्यम मात्र नभई कला, साहित्य, संस्कृति र सामाजिक रूपान्तरणको साझा अभियानसमेत बनेको छ।

मञ्चन अवधि : मंसिर ७ देखि १६ गतेसम्म

स्थान : झापा नाटक घर, झापा।