चाँडै तिमी आउनू
![Cover Image for News](https://nepalisahitya.com/storage/158/01J1EGK6S2C975A062NW9KCERZ.jpg)
जोडी छन् सबका म मात्र जहिले, जे गर्न एक्लो हुने,
मेला, पर्व र चाडवाड जति छन्, तिम्रै झझल्को हुने ।
तिम्रै साथ बसेर गाजल टिकी, सोचेँ कहाँ लाउँनू ?
राँके जानु छ वर्ष एक दिनमा, चाँडै तिमी आउनू । ।
गाईवस्तु लगेर पारि वनमा, छाडेर फर्किन्छु म,
गोठालासँग भेट गर्दिन कतै, देखेर तर्किन्छु म ।
भित्री यो मनमा छ गीत भरिलो, मैले कहाँ गाउनू?
तिम्रोझैँ वनमा बजेन मुरली, चाँडै तिमी आउनू।
भुल्ने हैन कथा मुनामदनको, पोल्ने गरीको छ है,
पैसा त्यो जति नै भए पनि यहाँ, रित्तिन्छ/ सिद्दिन्छ है!
चिन्ता दूर गरी खुला हृदयले, माया लिई आउनू ।
मेलापर्म गरेर चल्छ घर यो, चाँडै तिमी आउनू ।
मानो चामल लानुपर्दछ कतै, को लान्छ खै जान्दिन
कन्यार्थी हुन जानुपर्दछ कतै , को जान्छ खै जान्दिन ।
अर्काकै घरको बनी जुनकिरी, के ज्योति भै छाउँनू ?
जन्मेको घर गाउँ रुन्छ नमिठो, चाँडै तिमी आउनू ।
पुस्ता सार्नु छ एक काम कटिलो, खाडीतिरै छौ पति,
चड्दो वैँश म थेग्न सक्छु कसरी, सम्झेर बस्ने कति,
के भन्ने अब खै सके जति भनेँ, के धेर सम्झाउनू ?
नानी हाँस्छ छिमेकमा सुन सखे, चाँडै तिमी आउनू।
शिशिर
भट्टराई
इलाम
![User](https://nepalisahitya.com/images/user.png)
![शक्ति सङ्कल्प](https://nepalisahitya.com/storage/300/01J6E0NYJYGGZM7R3M1CPZ2Y93.jpg)
![स्रग्धरामा रमाऊँ](https://nepalisahitya.com/storage/194/01J323T5GZVTT7M3SHW4F1HAZJ.jpg)
![हेर्ने भए आउनु](https://nepalisahitya.com/storage/156/01J1BM9V42SN9ZXMR7TYSQM0BC.jpg)
![रहूँ यादमा म](https://nepalisahitya.com/storage/152/01J16PAEHFPV49D11M04R4FQE7.png)