भूस्वर्ग मेरो देश

देशको सुरक्षार्थ ज्यानको बाजी थापेर
 रणमैदानमा रहेको सिपाहीजस्तो,
 ठिङ्ग उभिएको छ पहाड
 सीमाहरुकै रक्षाका लागि सदैव
 अविरल गतिमा बग्दछन् मेची र काली
 म ढुक्क छु,मेरो देश सुरक्षित छ ।

 प्रकृतिको अनुपम छटामा
 पाखापखेरा र लेकबेसीहरुका
 कान्ला र गराहरुमा मन्द मुस्कुराहटसँगै
 अलिकति लजाउँदै कुमारी श्रृङ्गारमा
 रातो लाली लगाएर लालीगुराँस,
 पहेँलो गहना झल्काउँदै सुन्तला र जुहार
 हरियो सारीमा हरियाली जडुगल,
 नव दुलहीकी सजिएकी लाग्छ हाम्रो प्रकृति
 माथि हिमालबाट लामो रेसामा
 कल्कल गर्दै बगिरहेछन झरना
 झरनाको आवाजले यस्तो लाग्छ,
 कुनै नृत्याङ्गनाको
 खुट्टाको पाउजु एकनासले बजिरहेको छ ।

 हावाले बिरुवाको पातमा रेटेर
 मीठो धुन निकालिरहेको बेला
 चराचुरुङ्गीहरु जिउ छोडेर नाँच्छन्,
 गाउँछन् कोकिल आवाजमा
 मानौं दुलही भित्र्याउने खुसीमा
 खुबै जोडतोडले नाचिरहेछन्
 अल्लारे युवा युवतीहरु !
 सगरमाथाको शिर लिएर
 पहाडजस्तो छाती बनाउँदै
 चन्द्रसूर्य झण्डा बोकेर
 बुद्धको ज्ञान बाँड्दै
 भूगोलको उच्च स्थानबाट गर्व गर्छ
 मेरो देश भूस्वर्ग !!
                            -झापा