आत्मकल्याण छिन्छिन

 आत्मकल्याण छिन्छिन
जननाशौचले यद्वा मरणाशौचले तथा 
रोकिएका सबै श्राद्ध कृष्ण आश्विनपक्षका ।१। 
पाइन्छ गर्न हामीले शुक्लआश्विनपक्षमा 
पञ्चमीसम्ममा मात्र मानी गौण महालय ।२। 
न उक्से पञ्चमीसम्म अष्टमी द्वादशी लिनू 
व्यतिपात वा भरणी परेका तिथि झन् लिनू ।३। 
उक्सिएपछि जो पैले तोकेको तिथि पर्दछ 
हामीले तिथि त्यो पारी श्राद्ध नै गर्नुपर्दछ ।४। 
सूतकादि परी नित्य छेकिए सब यी तिथि 
लक्ष्मीपूजन औँसीमा गर्नुपर्दछ श्राद्ध ती ।५।
मासान्त कार्तिकै भित्र तिथि यो पनि रोकिए 
व्यतिपात र भरणी पर्ने ती तिथि नै लिए ।६। 
सबै नै श्राद्ध रोकिन्छन् मार्गशीर्ष छुएपछि 
कार्तिककृष्णको किन्तु औँसी पर्छ भने तिथि ।६। 
त्यसमा श्राद्ध रोकिन्न लागे मङ्सिर नै पनि 
हेक्का राख्नू यति कुरा श्राद्धकर्ताहरू गुनी ।७। 
सकिएन गर्न श्राद्ध सबै यी तिथि उम्किए 
हरे राम हरे राम निराश पितृ फर्किए ।८। 
छ हाम्रो शास्त्रमा हेर विकल्प यसको पनि 
दुरो अश्वस्य ... यो मन्त्र नित्य नै जप्नुपर्छ नि ।९। 
अर्को महालयसम्म एकसौ आठ दिन्दिन 
जपेमा पितृकल्याण आत्मकल्याण छिन्छिन ।१०।
कोही विद्वान् बनी भन्लान् ऋग्वेद जप्नु हुन्न है 
परन्तु तुक नै छैन यसको सार बुझ्नु है ।११।
यजुर्वेदीहरू निम्ति ऋग्वेद हैन दुश्मन
ऋग्वेदी मन्त्र नभई हुँदैन कति ठाउँमा ।१२।