सरकार

गजल
जस्केलोमा आग्लो हालेर केही हुन्न सरकार
झ्यालबाट फोहर फालेर केही हुन्न सरकार

लाज देखिने त खास जाङबाट हो नि होइन र?
ब्यर्थै घुँडामा टालो टालेर केही हुन्न सरकार

उता अन्न उब्जाउने खेतबारी सबै बाँजिएको छ
यता गमलामा बिउ सारेर केही हुन्न सरकार

कृषि क्रान्तिका लागि नयाँ योजना र बजेट आएन
 गलामा धानबिउको माला लतारेर केही हुन्न सरकार

बखतमा गर्ने कामको हेक्का नराखेरै बिग्रियो चाला
चोरसाँढे घुरेनमै पुग्यो साँध बारेर केही हुन्न सरकार

बनाउनुथ्यो देशको सुन्दर मुहार सीप र श्रम गालेर 
तर ब्यर्थैमा बालुवा पगालेर केही हुन्न सरकार