सम्झना भित्र "हुर्किएको घर"
सम्झना भित्र "हुर्किएको घर"
✍️ रचना दाहाल
तिमी हुन्थ्यौ भने
मलाई पनि"सानी"सम्झने
केही त हुन्थ्यो होला
"रानी" सम्झने कोही त हुन्थ्यो होला।
प्रत्येक कुना र भित्ताहरू
अनि,त्यहिं उम्रिएर बढेको हाम्रो पिरती
आज मसँगै ढल्कंदै हुन्थ्यो होला।
मैले खेलेका पलहरू
अनि देखेका सपनाका साक्षी
केही त हुन्थ्यो होला।
तिमी मेरो सपनीमा आईरहे जस्तै
यादका गोरेटाहरू
तिमी सम्मै पुगेर ठोक्किरहे जस्तै
मलाई पनि सम्झिएर बसेको
कोही त हुन्थ्यो होला।
पर्खिएर बसेको केही त हुन्थ्यो होला।
चञ्चल म अनि अडिग तिमी
रुञ्चे म अनि शान्त तिमी
परिवर्तनशील म अनि तटस्थ तिमी।
यादै यादका पहाडलाई खर्लप्पै बोकेको
ह्र्दय भरिको प्रिय तिमी।
तिमी भित्रको मेरो साम्राज्य
ति निसंकोच हर्कतहरू
अनि ती निडर बर्गतहरू
सम्झनाको बर्को ओडाएर
सुरक्षित संगालेको हुन्थ्यौ होला।
आज तिमी हुन्थ्यौ भने, मलाई पनि
धर्ती मै स्वर्ग भए जस्तै केही त हुन्थ्यो होला
स्वर्ग नै धर्ती मै रहे जस्तै केही त हुन्थ्यो होला ।
साच्चै !! कस्तो हुन्थ्यो होला ??
आज तिमी हुन्थ्यौ भने..........।
