मिलन मोडमा देउसी–भैलो महोत्सव, सिक्किमका मुख्यमन्त्री र दार्जिलिङका सांसद सहभागी

झापा२८ कार्तिक / दार्जिलिङको चम्पासरीस्थित मिलन मोडमा आयोजित एमपी देउसी–भैलो महोत्सवमा सिक्किमका मुख्यमन्त्री प्रेमसिंह तामाङ (गोले) र दार्जिलिङका सांसद राजु विष्टसहित विभिन्न क्षेत्रका विशिष्ट व्यक्तित्व तथा कलाकारहरूको सहभागिता रहेको थियो।

दार्जिलिङका सांसद राजु विष्टको पहलमा मिलन मोड व्यवसायी समितिको सहयोगमा आयोजित महोत्सवमा पश्चिम बङ्गाल सरकारका मन्त्री डा. शङ्कर घोष, राज्यमन्त्री, विधायकहरू, सामुदायिक अगुवा, कलाकार तथा सर्वसाधारणको उपस्थिति थियो। कार्यक्रममा कलाश्री विनोद खनाल पनि सहभागी भएका थिए।

महोत्सवले देउसी–भैलोलाई मनोरञ्जन र चाडपर्वको परम्परामा मात्र सीमित नराखी भाषा, संस्कृति, रीतिरिवाज, एकता र भाइचाराको जीवन्त अभिव्यक्तिका रूपमा संरक्षण गर्नुपर्ने सन्देश दिएको थियो। वक्ताहरूले पुस्तौँदेखि हस्तान्तरण हुँदै आएको यस परम्पराले पुर्खाहरूको मूल्य–मान्यता, सङ्घर्ष र सामूहिक पहिचानलाई प्रतिबिम्बित गर्ने उल्लेख गर्दै नयाँ पुस्तामा यसको महत्त्व हस्तान्तरण गर्नुपर्नेमा जोड दिएका थिए।

कार्यक्रममा सिक्किम सरकारले सबै समुदायका भाषा, परम्परागत पोसाक, रीतिरिवाज तथा सांस्कृतिक सम्पदाको संरक्षण र प्रवर्द्धनका लागि गर्दै आएका प्रयासबारे पनि चर्चा गरिएको थियो। सरकारी कार्यालय, शैक्षिक संस्था तथा सार्वजनिक प्रतिष्ठानहरूमा प्रत्येक बिहीबार परम्परागत पोसाक दिवस मनाउने पहललाई सांस्कृतिक विविधताको सम्मान र प्रवर्द्धनको उदाहरणका रूपमा प्रस्तुत गरिएको थियो।

वक्ताहरूले भाषा, संस्कृति र परम्पराले भौगोलिक तथा प्रशासनिक सीमाभन्दा माथि उठेर मानिसहरूलाई साझा इतिहास, पहिचान र आत्मीयताको सूत्रमा जोड्ने धारणा व्यक्त गरेका थिए। विविधतालाई समाजको शक्ति बनाउँदै पारस्परिक सम्मान, सद्भाव र एकतालाई कायम राख्नुपर्नेमा उनीहरूले जोड दिएका थिए।

महोत्सवले विभिन्न समुदायबीचको सांस्कृतिक सम्बन्ध र भाइचारालाई थप बलियो बनाउनुका साथै नयाँ पुस्तालाई आफ्नो मौलिक पहिचान र परम्परासँग जोड्न योगदान पुर्‍याउने विश्वास व्यक्त गरिएको थियो।