घातक ईश्वर
उस्ले निधारभरि
यसरी रङ्ग दल्यो र भन्यो
म विधाता हुँ तिम्रो भाग्यको !
उस्ले पहिले धोती लगायो
जनै लगायो
कन्धनी कस्यो र भन्यो
तँ राक्षस होस्
तँ दलित होस्
तँ जनजाती होस्
तेरो र मेरो भाग्यको
रेखा फरक फरक रङ्गले पोतिएको छ !
र भान्साकोठामा सबभन्दा माथि उसैले
आसन जमायो
शिवलिङ्ग अगाडि अश्लील ढङ्गले पल्टिएको
गजधम्म साँढेझैं !
उस्ले बिज्ञानलाई गाली गर्यो र
ईश्वरको स्थापना गर्यो
त्यो ईश्वर न कहिल्यै बोल्यो
न मानिसका पीडामा आँसु बगायो
ईश्वरले केही दिएन
प्रसादको नाममा कहिले मानिसकै रगत
कहिले पशुपन्छीका रगतले
आफ्नो शरीर भिजायो !
जब थाह पायो त्यो मानिसले
ईश्वरको अमुक शक्ति
र थाह पायो
मानिसको मनमा उत्पन्न भएको भय ।
उस्ले भगवानको मूर्ति फ्याँको
र आफै ईश्वर भएको घोषणा गर्यो
अहिले धर्मलुट भएको छ
व्यभिचार र अत्याचार भएको छ
र ईश्वर भनिएको
त्यो घातक छाया
पलायन भएको छ
मान्छेको बस्तीबाट !
गण्डकीपुत्र , झोराहाट , मोरङ्ग
हाल :- अमेरिका
