गायिका कोमल वलीका बुबाको छतबाट खसेर निधन

झापा, चैत १३ । लोकप्रिय गायिका कोमल वलीका पिता ललितबहादुर वलीको निधन भएको छ । पूर्व सांसद समेत रहेकी वलीका ८५ वर्षीय पिताको शुक्रबार दाङको तुलसीपुरस्थित आफ्नै निवासको छतमा घाम ताप्न जाने क्रममा खसेर निधन भएको हो ।

गायिका वलीले सामाजिक सञ्जालमार्फत बुवाको ‘महाप्रस्थान’ भएको जानकारी दिएकी छन् । वलीका अनुसार उनको पार्थिव शरीरलाई अन्तिम दर्शन र श्रद्धाञ्जलीका लागि तुलसीपुर (बाहिनी गेट नजिकै) रहेको निजी निवास ‘दिपा–ललित निवास’ मा राखिएको छ।

स्वर्गीय ललितबहादुर वली केवल एक अभिभावक मात्र नभई दाङको साहित्यिक र सामाजिक क्षेत्रका एक सक्रिय व्यक्तित्व थिए । वि.सं. १९९८ मंसिर १५ गते जन्र्मिका उनका ‘दर्पण’ (राष्ट्रिय गीत सङ्ग्रह) र ‘मातृभूमि’ (कविता सङ्ग्रह) गरी दुईवटा कृति प्रकाशित छन् । 

उनका सातवटा गीतहरू रेडियो नेपालमा रेकर्ड भएका छन्, जसमा देउसी भैलो, तीज र भजनहरू समावेश छन् । गायिका कोमल वलीका धेरै गीतहरूमा उनले मोडलिङ समेत गरेका छन् । उनी आफैँ पनि कुशल गायक थिए । कोमल वलीका अनुसार बुवाका केही गीतहरू रेकर्ड गरिदिने योजना बनाइरहेकै समयमा यो अकल्पनीय घटना भएको हो।