एउटा गहिरो मौनता

एउटा गहिरो मौनता
                          ✍️नैना अधिकारी 

हिजोका घटनाहरू जस्तै
आजका घटनाहरू पनि
लेखिनेछन्
इतिहासका पानाहरूमा
कुनै काला अक्षरले
कुनै सुनौला

के कहिले चिच्याउलान् त!
ती सबै कुरा
इतिहासको पानाबाट बाहिर निस्केर,
ती अक्षरहरूले
के कहिले माग्लान् त
मानवताले जोगाएर राखेका 
अँध्यारा रातका ती सबै घटनाहरूको हिसाब

सुनसान सडक 
सुतेको छ
गहिरो मौनता ओढेर
यत्तिकैमा 
दृश्यमान हुन्छ
एउटा निर्मम दृश्य
फिजिन्छ चारैतिर 
एउटा
कहालीलाग्दो चीत्कार
तर,
चिच्याउँदो आत्माको रोदन सुनेर 
बन्द गर्छन् सबैले
आफ्ना कानहरू
इतिहासका सुनौला अक्षरहरू
नखोज्ने उन्माद हुल

चौबाटाको बिचमा सजाइएका
ती तीन मूर्तिको
अनुहार 
फेरिएको छ -
एउटाले आँखामा पहेँलो चस्मा लगाएको छ
अर्काको कानमा खाँदिएको छ इयरफोन
बजिरहेको छ पप सङ
तेस्रोको जिब्रो
निरङ्कुश लपलपाइरहेछ बाहिर

दृश्य दृश्यमान हुँदै थियो
द्रुत गतिमा
अनि अगाडि उभिएको थियो
एउटा लामो भिड
सभ्यता र संस्कृतिको बोझ जस्तै
जीवित 
मूर्तिको रूपमा।

-कामरूप, खेत्री,असम