चहारेर आटो

                                                                 भुजङ्गप्रयात्

 तिमी जन्मिएका कुना कन्दराले 

कता छौ भनी बेसरी खोज्न थाले 

तिमी बैगुनी भै लत्याएर माटो 

डुलेका डुल्यै छौ चहारेर आटो ।।

यतै छन् मिठा बास्मती स्याउ तामा

यतै बासना छन् मकैका फुलामा

भकारी छ कोदो यहीं ब्यूपुला छन्

बगेको छ पानी नदी वा कुला छन् ।।

तिमी मात्र आए सबै मिल्छ चाँजो

तिमीले फुटाले सबै फुट्छ बाँझो

अशक्ता र बृद्धा रुँघी बस्नलाई

हुँदैह्वैन धर्ती बुझौं यत्ति भाइ ।।

तिमी फर्क आऊ हँसाऊ हिमाल

तिमी मुस्कुराऊ नाचाऊ हिमाल

तिमी हाँस आऊ हाँसाऊ पहाड

तिमी नाच आऊ नाचाऊ पहाड ।।

तिमी फर्क आऊ हँसाऊ तराई

तिमी मुस्कुराऊ नाचाऊ तराई

तिमी सल्बलाऊ पुरा देश हाँसोस्

तिमी नाच आऊ पुरै देश नाचोस् ।।

तिमी फर्किएमा मुमाले बुबाले

यसै धर्तिका बृक्षले बालुवाले

नियास्रो र एक्लो पना दूर गर्दै

विनाई खुशीले हुँकार्लान् मुसार्दै ।।