चाहना

कविता 

चाहना
            – कर्ण गुरुङ 

जीवन यस्तो होस्
ता कि म जिएको कसैलाई थाहै नहोस्,
अनि
मेरो मृत्यु यस्तो होस्
ता कि
म मरेको पनि कसैलाई थाहै नहोस्। 
तर
जीवन र मृत्युको आभास 
मात्र मलाई थाहा होस्। 

म को हुँ भनेर
मैले मात्र चिन्न सकूँ। 

हुरी-बतास, चिसो-तातो,
तल-माथि, सुख-दुःख सबै
मलाई मात्र थाहा होस्। 

म जिउँदै छु,
मात्र मलाई थाहा होस्। 

म मर्दै छु,
मात्र मलाई थाहा होस्। 

सारा कर्मको सम्बन्ध तोडेर
कहिल्यै नफर्किने गरी
यो आत्माले पनि
निर्वाण प्राप्त गर्न सकोस्।