असारे गीत

असारै लाग्याे  हलगोरू नार्दै खेतमा  रमाउँ  

कोदाली हातमा हलो र जुवा काँधमा थमाउँ 
हेरिरहुँ लाग्ने बर्खाको  दिनमा झरी र बादल
लाएर  बेठी  रोपार  नाचुन्   बजाउँदै मादल 
 
उखेल्दा बिउ थाकेको जिउ निद्राले बोलाउँछ 
घुमछाताओढीअसारे गाँउदा प्रकृति टोलाउँछ  
पुर्याउन सके  बिउका  मुठा राेपारका हातमा 
छपक्कै फुल्दा यो  गृष्म ऋतु असार मासमा 

पालोमै लाउँला कुलाको पानी खेतमा सलल 
रोपोको गाँजले हरियो फेर्दा गाँउ बेँसी झलल 
धानका  पाँजा उठाउँदै गरौं माटोको गुणगान 
कर्ममा विश्वास गरेर दिऊँ  देशलाई  बलिदान

ऐँचो  र  पैंचो भारो  र   पर्म  पूर्खाको  चलन 
दुखेको घाउमा ओखती आफैंआफैं हो  मलम 
रोपेर मानो फलाऊँ  है मुरी अनिकाल  टर्दछ 
मङ्सिर  मैना किसानले जब भकारी  भर्दछ🇳🇵