साहिँली सोल्टिनीको बैँस

खगिन्द्रा खुसी · साउन ११, २०८१ ९:२६ PM
Cover Image for News

साहिँली सोल्टिनीको बैँस माथि गुराँस भएर फुलेको छ लेकमा
 साँहिली सोल्टिनीको मुहार साटिएको छ जूनसँग
 पैँचो दिएकीछिन् सोल्टिनीले जीवनका रङ्गहरु इन्द्रेणीलाई
 कोइलीले एकैछिन भनेर लगेको उनको मखमली स्वर
 अझै फिर्ता गरेकै छैन ।
 
 सोल्टिनीको बत्ति जस्तै बल्ने मुहार खोइ ?
 खोई त्यो फूल जस्तै जवानी ?
 सोध्छन् भेट पिच्छे सपनामा
 सँगै धान नाचेका तरेबाहरु।
 
 तपस्यामा लीन ऋषि 
 ध्यानबाट फर्केकी आनी
 या त पिपलको फेदमा सुस्ताइरहेको वृद्ध बुद्ध 
 
 अचेल उनी यस्तै यस्तै केही देखिन्छिन् ।
 हिँजो साँझ सुत्दा सँगै भएको 
 सोल्टिनीको बैँस, रुमानी मन र चन्चलता
 आज जिन्दगीको एक बिहान ब्युँझिदा हराएर एकैसाथ
 आफैँलाई नै उदेक उदेक लाग्नेगरी
 मयक - मयक बाँचिरहेकी छिन् ।
 
 उँधो बगिरहेको नदीकिनार छेउ बसेर सोल्टिनी
 एकजोर तामे ढुकुरको प्रेमिल धान नाच हेरिरहेकी छिन्
 उनलाई पनि हठात् उठेर पालाम गाउँ त
 कहाँ नलागेको हो र ? 
 तर कोइलीले एकैछिन् भनेर लगेको उनको मखमली स्वर
 अझै फिर्ता गरेकै छैन
 गुराँसले एकै छिन भनेर फुलेको उनको बैँस बसन्त अझै सकिएकै छैन ।
 उँधो बगिरहेको उमेरको नदीकिनार छेउ बसेर
 साहिँली सोल्टिनी आफ्नै छायाँ बगाइरहेकी छिन् ।
 
 गगन योक्पाङ्देन
 मिक्लाजुङ , मोरङ 

ट्यागहरू:
सहित्य कविता literature svikarokti nepalisahitya
टिप्पणीहरू
User
यहाँ अझै कुनै टिप्पणी छैन। यस पोस्ट सम्बन्धी कुनै टिप्पणी भए माथिको फर्ममा टिप्पणी थप गर्नुहोस गर्नुहोस्।
सम्बन्धित पोस्टहरू
कविता उन्मुक्त हाँसो - प्रकाशचन्द्र खतिवडा
कविता उन्मुक्त हाँसो - प्रकाशचन्द्र खतिवडा
प्रकाशचन्द्र खतिवडा - बुधबार ४ नोभेम्बर २०२६
उसको आकाश अझै बाँकी छ
उसको आकाश अझै बाँकी छ
✍️ हिम्मत नेम्बाङ , पोष्ट-दिलिप घिमिरे - बुधबार ४ नोभेम्बर २०२६
गन्तव्य मोडिए पनि - सुभद्रा भट्टराई अर्याल
गन्तव्य मोडिए पनि - सुभद्रा भट्टराई अर्याल
खगिन्द्रा खुसी - बुधबार ४ नोभेम्बर २०२६
चङ्गा
चङ्गा
✍️ निलिमा आचार्य ,पोष्ट-दिलिप घिमिरे - आइतबार १ नोभेम्बर २०२६