नारीहरूप्रति

तिम्रा वाक्य मिठासले हृदयमा सद्भाव नारा भरून्
तिम्रा काेकिलकण्ठले मधुरता सङ्गीतजस्तै छरून्
लेखाेस् दूर भविष्यले विगतका उम्दा सुनाैला कुरा
बेलीझैं यश मग्मगाउन सकाेस् चुम्दै उचा टाकुरा ।१।
साँच्चै प्यास हटाउने छङछङे झर्ना हिमाली बन
चाेखाे प्यार सबै सबै हृदयमा गर्दैरहू सिञ्चन
नारीका मनमा रहन्छ जहिल्यै सद्भाव,सङ्लाेपन
देखाेस् शुक्लप्रभाव वास्तविक नै याे विश्वले कञ्चन ।२।
नारी हाै जल,व्याप्त भूमिभरिका खाेला नदी निर्मल
नारी ताल,कुवा,इनार सब हाै ,हाै सिन्धुव्यापी जल
उड्नू वाफ भई ,झरेर अवनी पार्नू तिमी ऊर्बर
बन्नू प्राणप्रदायिनी जगतकी झन् सत्यमा सुन्दर ।३।
ईर्ष्या आपसमा नहोस्,रिस नहोस्,नारीत्व,सम्मान होस्
छोरी-भ्रूण चिनेर मार्न सुरिने निष्ठूर आमा नहोस्
पुस्ता-द्वन्द्व ,दहेज,निन्द्य करणी,हत्या बलात्कारका
हिंसाजन्य निकृष्ट कार्य सकिऊन्,सारा कलङ्की टीका ।४।
बन्दै क्रूर भयङ्करी विकृतिमा दुर्गा र चण्डी बनी
जाईलाग, नियाँ दिने युगजयी उद्देश्य राखी तिमी
तिम्रै साथ लिएर मात्र युगले गन्तव्य पैल्याउँछ
देऊ वत्सल प्यार विश्वभरि नै,मातृत्व माैलाउँछ ।५।




