किरातीम्मा बोजू

किरातीम्मा बोजू  
               -सुमित्रा वाङ्देल चेली 
मानव उद्गम थलो
मेहेन्जोदारो हरप्पा
सिन्धुघाटी सभ्यता
अलाप्दै मुन्धुमी ऋचा
बोजू कसरी रचायौ ?
थि‚ आराखाको प्रयोगशाला र बनायौ मर्चा ?
कुन–कुन जडीबुटी कहाँ–कहाँ पाइन्छ ?
कुन जडीलाई कुन अन्न चाहिन्छ ?
बोजू ‚ कसरी पत्ता लगायौ? यस्तो अचुक औषधी
जसले कुहिन्न अन्न‚बदलिन्छ अर्कै रुप
बोजू न गयौ विद्यालय‚
न पढ्यौ रसायनशास्त्र
कसरी रोप्यौ कपास?
कसरी लगायौ तान?
कसरी बुन्यौ खाँडी?
कसरी जान्यौ ज्ञान?
बोजू ‚ उपभोक्तावादी बजारमा
कसले खोज्ने? तिम्रो इतिहास
मेडम क्यूरी अमर बनिन्
जित्नेको घोडा हो इतिहास
इतिहासमा बाँचिरहन्छन्
हार्नेहरू मेटिँदै जान्छन्
समयका भेलहरूमा
तर बाँचेकै छ एउटा प्रश्न
बोजू ‚ किन रोइरहेछ ?
नदी किनारमा थिबिप्मा चरा ।
                               झापा