मधु पोख्रेलको गजल

मनका मझेरीमा आमा राख्न पाए हुन्थ्यो
विदेशका नेपालीलाई डाक्न पाए हुन्थ्यो ।

कानुनका व्याख्याता नै दलका मान्छे हुंदा रैछन्
देश बेच्ने सबैलाई जाक्न पाए हुन्थ्यो ।

तलदेखि माथिसम्म बिचौलिया राज भैगो 
गणतन्त्रले जनतालाई ढाक्न पाए हुन्थ्यो ।

अखण्ड यो नेपाल हो प्राण भन्दा प्यारो हुन्छ
पराईका दलाललाई ताक्न पाए हुन्थ्यो । 

शक्तिशाली ठन्नेहरू हराएछन ईतिहासमा
जनताको शासन सत्ता चाख्न पाए हुन्थ्यो ।