ऋजन मायालुको ‘घुम्ती विक्रीमा छ’ बजारमा

युवा कवि ऋजन मायालुको कविता सङ्ग्रह ‘घुम्ती विक्रीमा छ’ आज सार्वजनिक गरिएको छ।
 
पेसाले बैंकर रहेका इलामका कवि तथा गीतकार रिजन मायालुको यसअघि ‘चुचुरो अनि स्वास्नी मान्छेहरू’ नामक कवितासंग्रह सार्वजनिक गरिसकेका उनको यो दोस्रो कवितासंग्रह हो ।मायालेको `उज्यालोका मालीहरू’ संयुक्त कविता–सङ्ग्रह ‘प्रकाशित भइसकेको छ । 

काठमाडौँको लेखन कुञ्जमा वरिष्ठ कवि भुवनहरि सिग्देलको सभापतित्वमा आयोजित एक समारोहमा कवि सिग्देल, कवि मायालु तथा समीक्षकहरू डा. अशोक थापा र प्रेमिला राईले मायालुको उक्त कृति सार्वजनिक गरेका हुन् । 

 कृतिमाथि आफ्नो धारणा राख्दै समीक्षक प्रेमिलालाईले मायालुका कवितामा खस्कँदो मानवीय मूल्यप्रतिको आक्रोश, र मानवताको वकालत सबैभन्दा मुखर अभिव्यक्त भएको बताइन् । साथै, उनले मायालुका कवितामा माया–प्रेम, प्रकृति, युवा वयका उछ्वास र स्थानीय समस्याहरू पनि बाक्लै आएको बताइन् ।

अर्का समीक्षक डा. अशोक थापाले पूर्वी पहाड, विशेष गरी इलाम र त्यहाँको जनजातीय परिवेशबाट टिपिएका स्थानीय विम्बहरूको बाहुल्य मायालुका कविताको प्रमुख विशेषता भएको बताए । उनले भने- ‘इलाम, पहाडी जनजीवन, नदीनाला, प्रकृति र संस्कृतिका विम्बहरूको संयोजनले मायालुलाई एक काबिल कविको रूपमा प्रस्तुत गरेको छ ।’

 सभालाई सम्बोधन गर्दै मायालुले आफ्नो कविता यात्राको स्मरण सुनाए । आफू कवितामा चर्को आवाजभन्दा पनि यथार्थको मधुरो स्वर सुन्न–सुनाउन चाहने सर्जक भएका नाताले कवितामा प्रेम र जीवन मूल विषय भएर आउने गरेको बताए । सभापति सिग्देलले इलाम र त्यस वरिपरिको परिवेश र संस्कृतिको विवेचना गर्दै त्यस समृद्ध भूगोल र सांस्कृतिक परिवेशले मायालुको कवितामा ऊर्जा र निखार थपेको टिप्पणी गरे । कार्यक्रममा कविहरू स्वप्नील स्मृति, महेश कार्की क्षितिज तथा सञ्जय सुमनले सङ्ग्रहभित्रबाट कविता वाचन गरेका थिए । 
 कृतिलाई पेज टर्नरले बजारमा ल्याएको हो ।