उपप्राध्यापक तथा समालोचक पुण्य खरेलको निधन
मेची बहुमुखी क्याम्पसका उपप्राध्यापक तथा समालोचक पुण्य खरेलको निधन भएको छ । विगत लामो समयदेखि मेची बहुमुखी क्याम्पसमा सेवारत खरेल यही आउँदो फागुन महिनामा निवृत्त हुँदै हुनुहुन्थ्यो । एउटा समालोचना कृतिका कृतिकार, भाषा तथा साहित्य विषयको गहिराइसम्म पुगेर विषयलाई प्रष्ट पार्न सक्ने कुशल तथा विज्ञ प्राध्यापक, लेखनका कमजोरीहरुलाई माफ नगरी कडाईकासाथ समालोचना गर्ने खरो समालोचक खरेलको आज विहान हृदयघातका कारण निधन भएको हो । एक हप्ता अगाडि मुटुको सामान्य समस्या देखिएपछि उपचारका लागि काठमाडौँ पुगेका खरेलको आज विहान प्रभातफेरिका क्रममा अचानक हृदयघात भएको थियो । विशेषत: प्रगतिशील चिन्तनमा दख्खल राख्ने उहाँको निधनले नेपाली भाषा, साहित्य तथा समालोचनाका क्षेत्रमा अपूरणीय क्षति भएको छ । पुण्य खरेलको आत्माले शान्ति पाओस् भन्दै नेपाली साहित्य डटकम उहाँप्रति भावपूर्ण श्रद्धाञ्जलि अर्पण गर्दछ ।
