सम्झौता र मौनता

कविता 

सम्झौता र मौनता

                ✍️ नेपाली आशुकवि 

सम्झौता त मौनतासँग
हामीले धेरैअघि गरेका थियौं,
तिमीले भावना लुकायौ,
मैले आँसु पिउन सिकेँ। 

एउटै छानामुनि बसेर पनि
हामी अपरिचितजस्तै भयौं,
तिमी बोल्न छोड्यौ,
म सुन्ने आशा गर्दै थाकें। 

कति रातहरू
तिम्रो पिठ फर्किएको न्यानोमा 
म एक्लै चिसिएँ,
तिमी निदाएको अभिनय गर्थ्यौ,
म रोएको लुकाउँथेँ। 

सम्बन्ध जोगाउने नाममा
हामीले आफ्नै मन मार्यौं,
अरूले “सुन्दर जोडी” देखे,
तर हामीभित्र
मृत सपनाको गन्ध थियो। 

तिमीले कहिल्यै सोधेनौ —
“थाक्यौ ?”
र मैले कहिल्यै भनिनँ —
“अब सक्दिनँ।” 

किनकि हाम्रो प्रेमभन्दा ठूलो
हाम्रो मौनता बनिसकेको थियो। 

आज पनि
तिमी मेरो छेउमै छौ,
तर तिमीसम्म पुग्न
मेरो सम्पूर्ण जिन्दगी अपुग छ। 

सम्झौता र मौनताले
हाम्रो सम्बन्ध त बचायो होला,
तर बाँचिरहेका हामीभित्रका
दुई मुटुहरू
धेरैअघि मरिसके।

          ©