घरदलान साहित्य अभियानको छयत्तरौ शृङ्खला विकल्पको घरदलानमा
चैत्र १०गते /झापा जिल्ला बुद्धशान्तिमा अभियानको रूपमा सञ्चालन हुँदै आएको घरदलान साहित्य अभियानको छयत्तरौं शृङ्खला बुद्धशान्ति - ३ बुधबारे निवासी अभियन्ता टंक विकल्प तथा तुलसा काफ्लेको घरदलानमा सम्पन्न भएको छ ।
अभियन्ता वसन्तकुमार तिम्सिनाको अध्यक्षता र साहित्यकार मिरा काफ्ले पोखरेलको प्रमुख आतिथ्यमा उक्त शृङ्खला सम्पन्न भएको हो । कार्यक्रम आयोजक अभियन्ताले नै सञ्चालन गर्ने अभियानको नियम बमोजिम टङ्क विकल्पद्वारा सञ्चालित सो कार्यक्रममा उपस्थित सम्पूर्णलाई स्वागत आयोजक परिवारकी तुलसा काफ्लेले गर्नु भएको थियो ।
कार्यक्रममा बीसवर्ष मुनिका नयाँ पुस्ताको प्रस्तुति रहने नियम अनुसार विमर्श निरौलाबाट आरम्भ भएको सो शृङ्खलामा स्रष्टाहरू केशव आचार्य , दिलीप घिमिरे , खगिन्द्रा खुसी , पुष्प काफ्ले , विष्णु पोखरेल चित्रा पौड्याल ,निर्मला आचार्य , ज्ञानु बुढाथोकीले गजल प्रस्तुत गरेका थिए । त्यसैगरी प्रमुख अतिथि मिरा काफ्ले पोखरेल , विशिष्ट अतिथि प्राज्ञ मुनाराज शेर्मा , गणेश निरौला , जय भण्डारी , धनबहादुर श्रेष्ठ ,माधव खतिवडा , गीता सुवेदी , पुण्य बराल , प्रकाश न्यौपाने , राजु पौड्याल , अर्जुन पाण्डे , केदार कोइराला , माधव तिम्सिना , मोक्ष खतिवडा , राजेन्द्र रिजाल , भुवन तामाङ , उषा अधिकारी ,ललिता पोखरेल , जयनारायण अधिकारी नमुना निरौला र टंक विकल्पले कविता प्रस्तुत गरेका थिए भने सभाध्यक्ष वसन्त तिम्सिना र शशिधर भण्डारीले हाइकु प्रस्तुत गरेका थिए । कार्यक्रममा दिव्या निरौला , शान्ता श्रेष्ठ , रूपा उप्रेती र प्रदीप सुवेदीले गीत गाएका थिए ।
बुद्धशान्तिभित्रका स्रष्टाहरूको काव्यिक क्षमता वृद्धि गर्न , साहित्य र सङ्गीतका साधक तथा पारखीहरूको वृद्धि गर्न , गाउँ , कुनाकन्दराभित्र ओझलमा परेका प्रतिभाहरूलाई प्लेटफर्म दिंदै अब्बल साधक र सर्जक बनाउन र स्रष्टाहरूको घरपरिवार ,सिर्जनात्मक वातावरणसँग समेत जानकारी लिने र समाजमा साहित्यिक तथा साङ्गीतिक कार्यक्रमप्रति अपनत्व विस्तार जस्ता अवधारणा हेतु २०७४ साल मङ्सिर महिनाको अन्तिम शनिबारदेखि आरम्भ भएको घरदलान साहित्य आठौं वर्षमा प्रवेश गरिसक्ता पनि कुनै औपचारिक समिति नभई अनौपचारिक रूपमा नै चलिरहनु , गाउँघरमा लघु तथा अखण्ड पुराण , सत्यनारायणको पूजा , रुद्री , जन्मोत्सव , स्वस्थानीको पूजा जस्ता कार्जेहरूमा आफन्त , नातागोता र छरछिमेकहरू भेला भएर कथा सुनेझैं र प्रसाद वितरण गरेझैं घरेलु खाजानास्ता वितरण जस्ता मौलिक चलनले घरदलान साहित्य अभियान बेग्लै र सुन्दर विशेषताहरू बोकेको कार्यक्रमको रूपमा स्थापित भएको छ ।
घरदलान साहित्य अभियानको आरम्भमा गणेश निरौला , बेनुप्रसाद पनेरू ' टंक विकल्प , जय भण्डारी , उषा अधिकारी , हेमन्ता भण्डारी , धनबहादुर श्रेष्ठ लगायतका अभियन्ताहरूद्वारा चलाइएको यस साहित्यिक अभियानको आठौं वार्षिकोत्सव सम्म आइपुग्दा प्रकाश न्यौपाने , धनबहादुर श्रेष्ठ , हेमन्ता भण्डारी , पुष्प काफ्ले , कमल कोइराला र चित्रा पौड्याल गरी छ जनाले वर्षकवि सम्मान तथा पुरस्कार प्राप्त गरिसकेका छन् ।
त्यसैगरी भक्तिप्रसाद विमला (भवि पुरस्कार ) र तुलसी मञ्जरी पुरस्कार स्थापित भइसकेका छन् यस अभियानमा । त्यसैगरी यस अभियानले हालसम्म अभियानमा आबद्ध स्रष्टाहरुका प्रतिनिधिमूलक कविताहरुको सङ्गालो "घरदलान " का तीनवटा अङ्क प्रकाशन गरिसकेको छ भने यस शृङ्खलासम्म आइपुग्दा करिब चार दर्जन भन्दामाथि अभियन्ताहरू र थप सहयोगी अभियन्ताहरू आर्जन गरिसकेको विवरण बताउँछन् छयत्तरौं शृङ्खलाका आयोजक अभियन्ता टङ्क विकल्प ।
