फर्पिङमा बृहत् कवि गोष्ठी सम्पन्न
झापा २५ माघ/ नेपालको ऎतिहासिक पहिलो जलविद्युत उत्पादन गृह फर्पिङको पानीपोखरीमा संयुक्त बृहत् कविता वाचन कार्यक्रम सम्पन्न गरिएको छ।
१९६८ सालमा राणाकालिन प्रधानमन्त्री चन्द्रशमशेरद्वारा निर्माण गरिएको चन्द्रज्योति नाम दिइएको विद्युत दरबारमा जोडिन्थ्यो। यसलाई नेपालको पहिलो जलविद्युत गृह मानिन्छ।
सुसेली साहित्यिक प्रतिष्ठान, शब्दाङकुर, वर्तमान कविता समूह र शब्दपथले आयोजना गरेको कार्यक्रममा काठमाडौँ,भक्तपुर र ललितपुरका स्थापित कविहरूको उपस्थिति रहेको थियो ।
अलिअलि घाम,बतासमा प्रकृतिको रमणीय स्पर्श सहित कविता सुन्ने सुनाउने मन्त्रमुग्ध भएका थिए । कार्यक्रममा सभापति,प्रमुख अतिथि बनाइएको थिएन,सबै कविहरूलाई प्रमुख भनी सम्बोधन गरिएको थियो।
आयोजक संस्था शब्दपथका प्रधान सम्पादक किशोर पहाडीले "आज मेरो एउटा सपना पूरा भयो" भन्दै "यो ऐतिहासिक स्थानमा स्रष्टा पदयात्रा सहित रचना वाचन गर्ने सपना केही वर्ष पहिलादेखि देखेको थिएँ। हाम्रो उमेरका मित्रहरू हिंडन गाह्रो मान्ने भएकाले सवारी साधनमै आएर भए पनि,चार विभिन्न संस्थाहरू मिलेर सम्पन्न गरिएकोमा खुशी लागेको छ" बताए।
पर्यटन विषयमा वाचन गरिएका कविताहरू शब्दाङकुरमा अंग्रेजीमा अनुवाद गरी प्रकाशन गरिने आयोजकले जानकारी गराएका थिए ।
रचना वाचन गर्ने कविहरूलाई आयोजक समूहका किशोर पहाडी,रमी प्रिया,राजाराम केसी र राजेन्द्र लिङ्देनले मायाको चिनो प्रदान गरेका थिए । कार्यक्रमपश्चात् कविहरूलाई स्थानीयले नेवारी समेबजी खाजाले स्वागत गरेका थिए भने कविहरूले ऐतिहासिक जलविद्युत गृह, स्मारकस्थल,राणाहरूको तत्कालिन विश्रामगृहको अवलोकन पनि गरेका थिए।
कार्यक्रम सञ्चालन सुसेली साहित्यिक प्रतिष्ठानका सल्लाहकार डा. शेखरकुमार श्रेष्ठले गरेका थिए ।
