अखबार

बिहानै आइपुग्छु 
तिम्रो घरमा 
चाहे तिमीले पसलबाट ल्याउ 
वा 'हकर'ले फालेर जाओस् । 
केही चाख मानेर 
तर धेरै दिक्क मानेर पढ्छौ, 
चियासँगै मेरा पानाहरू पल्टाएर 
तिमी आफूलाई 'अपडेट' बनाउँछौ 
केही समाचार त भात पकाउँदै गरेकी 
श्रीमतीलाई पनि सुनाउँछौ । 
० 
पढ़िसकेर थन्काउँछौ एकातिर 
अनि केही पोको पार्न 
वा ऐना सफा गर्न निकाल्छौ  
तै पनि उब्रिएँ भने 
कुनै कबाडीलाई बेचेर 
केही रुपियाँ असुल्छौ, मेरो नाममा । 
० 
अचेल, अनलाइन भन्ने 
सौता भित्रिएकी छिन् मेरो संसारमा 
मलाई हेप्न थालेका छन् , मान्छेहरू 
नढाँटी भन त –
के अचेल तिमीलाई मन लाग्दैन 
मलाई स्पर्श गर्न 
र, एक फेर मात्र होइन 
घरीघरी प्रयोग गरिरहन ? 
०० 
- राजेन्द्र शलभ