ए अन्तरे !

ए अन्तरे ! 
मैले आफ्नै अगाडि 
तारा खसेको देखेको छु 
सगरमाथा चढनेहरु  
फेदमा झरेको देखेको छु 
समुद्र पुग्ने खोला पनि 
बाफ भएको देखेको छु 
तिमी के भन्छौ अन्तरे ?
मैले चर्खा घुमेको देखेको छु 
घाम डुबेको देखेको छु 
पूर्णिमा मात्र होइन 
औंसी पनि देखेको छु 
मुस्कान हेर्दाहेर्दै 
मधुस भएको देखेको छु 
मेरै अगाडि स्वर्ग पनि 
नर्क बनेको देखेकोछु 
दिन मात्र होइन अन्तरे 
रात परेको पनि देखेको छु 
तिमी बस्ने धर्ती 
मैले पनि टेकेको छु 
यति मात्र बुझ 
साउने भेल देखेको छु 
हुरी बतास देखेको छु 
मेरै अगाडि
बहुलाएर शान्त भएको देखेको छु 
हजार दर्शनहरु मृत्यु अगाडि 
घुँडा टेकेको देखेको छु 
तिमी को हौ र ?
हिटलर संसार जित्दै 
लाचार ! हारेको देखेको छु 
ए  अन्तरे ! 
मैले आफ्नै अगाडि 
तारा खसेको देखेको छु 
भष्मासुर भष्म भएको देखेकोछु 
भरी भाँडा खाली भएको देखेको छु 
शक्तिशाली घाम डुबेको देखेको छु 
चर्खा घुमेको पनि देखेको छु