वरिष्ठ साहित्यकार एवम् समालोचक प्रा.डा. गोविन्दराज भट्टराई सम्मानित

भक्तपुर, कार्तिक २०
वरिष्ठ साहित्यकार, लेखक एवम् समालोचक प्रा.डा. गोविन्दराज भट्टराई मंगलवार भक्तपुरमा सम्मानित हुनुभएको छ । भट्टराईलाई चक्रपाणी स्मारक प्रतिष्ठानले चक्रपाणी स्मरण पुरस्कार–२०८१ ले सम्मान गरेको हो ।
प्रतिष्ठानले चक्रपाणी चालिसेको जन्मस्थान सूर्यविनायक नगरपालिका–५ कटुञ्जेस्थित चक्रपाणीको प्रतिमास्थलमा आयोजित कार्यक्रममा जलस्रोत, सीमा एवम् प्रशासन विद, पुर्वसचिव द्धारिकानाथ ढुंगेलले सम्मान गर्नुभएको हो ।
कार्यक्रममा ढुंगेलले नेपाली साहित्य पनि विश्वस्तरको भएको बताउँदैं साहित्यमा रविन्द्रनाथ टेगोरले नोवेल पुरस्कार जिते जस्तै नेपाली साहित्यकारले पनि जित्ने अपेक्षा राख्नुभयो । उहाँले अहिलेका नयाँ कथाकारहरुले पुराना कथाहरुको अध्ययन गरेर त्यस्तै उत्कृष्ट कथा नेपाली साहित्यलाई दिनुपर्ने सुझाव समेत दिनुभयो ।
सो अवसरमा वरिष्ठ साहित्यकार एवम् समालोचक प्रा. डा. कुमार कोइरालाले सम्मानित व्यक्तित्व भट्टराईको संक्षिप्त परिचय प्रस्तुत गर्दै भट्टराईले नेपाली साहित्यलाई विश्वसामू चिनाउन अहम भूमिका निर्वाह गरेको चर्चा गर्नुभयो ।
कार्यक्रममा सम्मानित व्यक्तित्व भट्टराईले चक्रपाणी स्मरण सम्मानले आफुले जीवनमा नेपाली साहित्यमा केही योगदान गरेको अनुभती भएको प्रतिक्रिया दिनुभएको थियो ।
सो कार्यक्रममा प्रतिष्ठानले सूर्यविनायक नगरपालिकाभित्र सञ्चालित सार्वजनिक र नीजि स्रोतबाट सञ्चालित विद्यालयमा अध्ययन गरी माध्यामिक शिक्षा परीक्षा (एसईई) २०८० मा नेपाली विषयमा सर्वाधिक अंक ल्याउन एक छात्र र एक छात्रालाई नगद ५ हजारसहित वैजनाथ शुभद्रा प्रोत्साहन पुरस्कार २०८० बाट पुरस्कृत गरिएको थियो ।
वरिष्ठ साहित्यकार बैजनाथ चालिसेले आफु र आफ्ना धर्मपत्नी शुभद्रा चालिसेको नाममा स्थापना गरेको सो पुरस्कार प्राप्त गर्ने छात्र कटुञ्जेस्थित युनिटी इङ्गलिस स्कुलका आशिष थापा हुन भने छात्रामा दधिकोटस्थित मोर्डन स्कुलका समिरा माकजू रहेका छन ।
कार्यक्रममा १० जना कवि एवम् कवियत्रीहरुले आ–आफ्नो कविता वाचन गरेका थिए । साथै प्रतिष्ठानले आयोजित राष्ट्रव्यापी कथा प्रतियोगितामा प्रथम, द्धितिय, तृतिय र सान्त्वना पुरस्कार प्राप्त गर्ने कथाकारहरुलाई नगदसहित पुरस्कृत गरिएको थियो । साथै कथा प्रतियोगितामा सहभागी मध्ये उत्कृष्ट ३० वटा कथालाई समेटेर तयार गरेको कथासंग्रह ‘साहित्य वार्षिक चक्रपाणि’को लोकर्पण समेत गरिएको थियो ।