पिता-पुत्रको संयुक्त कृति 'वंशवृक्ष'को परिचर्चा सम्पन्न

झापा,चैत ५ । राजधानीमा सम्पन्न एक कार्यक्रममा दुई स्रष्टाको संयुक्त कृति 'वंशवृक्ष'को परिचर्चा तथा कविता वाचन कार्यक्रम सम्पन्न भएको छ । साहित्यिक पत्रकार संघ तथा मिलाप म्यागजिनको संयुक्त आयोजनामा चैत ४ गते सम्पन्न भएको सो कार्यक्रममा प्रा.पुरूषोत्तम दाहाल र अनिमेष दाहाल(बाबु छोरा)को उक्त संयुक्त कविताकृतिको परिचर्चा भएको हो । 

साहित्यिक पत्रकार संघका अध्यक्ष राधेश्याम लेकालीको सभापतित्व तथा प्रा.डा.कुलप्रसाद कोइरालाको प्रमुख आतिथ्यमा सम्पन्न सो कार्यक्रममा समालोचक युवराज मैनाली, डा.ज्ञानु अधिकारी, खेमनाथ दाहाल, कला निधि दाहाल, उप-प्राध्यापक घनेन्द्र ओझा लगायत घरपरिवार सदस्यहरू तथा साहित्यकारहरूको बाक्लो उपस्थिति रहेको थियो।

प्रमुख आमन्त्रित व्यक्तित्व प्रा.डा.कुलप्रसाद कोइरालाले आफ्नो मन्तव्यमा वाल्मीकि ऋषिदेखि कवि कालिदासको प्रसङ्ग उठाएका थिए । वंशवृक्षका बारेमा बोल्दै उनले पिता- पुत्रको संयुक्त कृतिको लागि प्रशंसा सहित बधाई दिएका थिए । पिताको जीवाणु अंश छोराछोरीमा जानु स्वाभाविक भएको बताउँदै उनले बाबु छोराको कुरा नभई सृजनशीलताको कुरा बताए। पूर्वीय दर्शन बारे बोल्दै उनले वेद विज्ञानमय र विज्ञान वेदमय भएको बताए।

सभापतिको आसनबाट बोल्दै साहित्यिक पत्रकार संघका अध्यक्ष राधेश्याम लेकालीले साहित्यिक पत्रकार संघ तथा मिलाप म्यागजिनको संयुक्त आयोजनामा 'वंशवृक्ष' कृतिको विमोचन गरिएको स्मरण गराउँदै हिजो पनि संयुक्त रूपमा परिचर्चा कार्यक्रम गरिएको बताए। उनले कविद्वय दाहाल पिता-पुत्रको व्यक्तित्व तथा कृतित्वमाथि संक्षेपमा प्रकाश पार्दा ३० को दशकको कवि र एआई जमानाका कविको संयुक्त कृतिका लागि बधाई दिएका थिए। 

कार्यक्रममा कवि प्रा.पुरूषोत्तम दाहालले 'वंशवृक्ष' कृतिबारे संक्षेपमा प्रकाश पार्दै पुत्र अनिमेषलाई साहित्यकारहरूसँग साक्षात्कार परिचय गराउन परिचर्चा कार्यक्रम गरिएको कुरा बताए। वंशवृक्षको रचना अमेरिकामा रहँदा भएको उल्लेख गर्दै उनले विमोचनका समयमा अनिमेष अमेरिकामा रहेको बताए। कवि दाहालको पहिलो कविताकृति 'साँध'बाट एउटा गीत र 'साँध' शीर्षककै कविता वाचन गरेर सुनाएका थिए। साथै,उनले वंशवृक्ष कृतिबाट'साथी ! रक्सी देउ र पुस्तक लैजाउशीर्षकको कविता लगायत अन्य केही कविताहरू वाचन गरेर सुनाएका थिए।

त्यसैगरी,अर्का कवि अनिमेषले उनको पछिल्लो कविता'म न हिंडेका बाटाहरू'र वंशवृक्षबाट मनराजा,बिहानी,म भित्रको कवि,जीवन,पैसा,बूढो,भूकम्प शीर्षकका कविताहरू वाचन गरेर सुनाएका थिए।

कार्यक्रममा समालोचक युवराज मैनाली, डा.ज्ञानु अधिकारी, उप-प्राध्यापक घनेन्द्र ओझाले वंशवृक्ष कविताकृतिमाथि संक्षेपमा समीक्षात्मक टिप्पणी सहित परिचर्चा गरेका थिए।

कार्यक्रममा खेमनाथ दाहाल, कलानिधि दाहाल, ठाकुर शर्मा भण्डारी, दुर्गा भँवरकोटी, डा.कृष्णप्रसाद भट्टराई, जीवन श्रेष्ठ लगायत अन्य केही साहित्यकारहरूले शुभकामना मन्तव्य राखेका थिए।

अनामनगरस्थित डालो रेष्टुरेन्टमा भएको कार्यक्रम गणेश सुवेदीले गरेका थिए।