गजल - श्रेष्ठ प्रिय पत्थर

 जो जागिरमा जे छ,त्यो पाजी व्यापारमा के छ
नभन्नू त्यो हवलदारमा के छ खरिदारमा के छ 

उस्तै हुन् मान्छेहरु उस्तै हो मान्छेको प्रवृति पनि
मान्छेलाई अलगपार्ने राजनीतिको धारमा केछ 

डराउदैनन् अपराधी जस्तो सुकै अपराध गर्दा
डरले सातोजाने साँच्चै त्यो अख्तियारमा के छ 

न कसैको भरोसा गर्छ न त थाप्छ ऊ हात नै
सोध्छ दुनियाँ त्यो कंगाल बेरोजगारमा के छ 

यु .के .को सपना देख्दै उमेर पनि ढल्की सक्यो
भन्छन् साथिभाइ अझै हैट!त्यो कतारमा के छ 

चामल भने सडेर जान्छ पिठो सहजै बिक्छ
बोल्नेकै तारीफ हुन्छ, भन्छौ ? प्रचारमा के छ 

आरिस केलाई गर्नु ? किन उछित्तो काढ्नु ?
मह काढ्नेलाई थाह छ आँखिर भंसारमा के छ

दुनियाँ रंगीन हुन्छ र खुसीको वर्षात हुन्छ 
दिनेले खुसुक्क दिए नसोध्नू उपहारमा के छ