अन्तर्राष्ट्रिय नेपाली साहित्य समाज क्यानबेराको तीज विशेष साहित्यिक कार्यक्रम सम्पन्न
अन्तर्राष्ट्रिय नेपाली साहित्य समाज क्यानबेराको अध्यक्ष महता घिमिरेको अध्यक्षतामा क्यानबेरामा आयोजना गरेको ‘शब्दमा शक्ति, सिर्जनामा स्वतन्त्रता’ विषयक तीज विशेष साहित्यिक कार्यक्रम सफलतापूर्वक सम्पन्न भयो।
कार्यक्रममा नेपालका लागि अष्ट्रेलियास्थित कार्यवाहक राजदूत माननीय तारा गौतमज्यू तथा माननीय डेभिड स्मिथ सांसदज्यूको गरिमामय उपस्थितिले कार्यक्रमलाई थप विशेष बनायो। नेपालबाट आउनुभएका अतिथि कविहरू डा. गार्गी शर्मा र वेदकुमारी न्यौपानेज्यूले समेत आफ्ना सशक्त कविता प्रस्तुत गरी कार्यक्रमलाई थप अर्थपूर्ण बनाउनुभयो।
यस अवसरमा अष्ट्रेलियाका विभिन्न राज्य तथा शहरबाट क्यानबेरा आउनुभएका महिला साहित्यकारहरूलाई नेपालस्थित दूतावासमा आत्मीय स्वागत कार्यवाहक राजदूत तारा गौतमज्यू तथा सम्पूर्ण दूतावास परिवारले गर्नु भयो। उहाहरूको सिर्जनात्मक यात्रालाई सम्मान गर्दै आफ्नै घरजस्तो आत्मीय वातावरण प्रदान गर्नुभयो र नेपाली भाषा तथा साहित्यका विविध पक्षमा प्रेरणादायी संवाद गर्ने अवसर दिनुभयो।
उक्त भेटघाटमा नेपाली भाषा तथा साहित्यको वर्तमान अवस्था, डायस्पोरामा नेपाली साहित्यको निरन्तरता, नयाँ पुस्तामा भाषा र संस्कृतिको हस्तान्तरण तथा आगामी दिनमा साहित्यिक गतिविधिहरूलाई अझ व्यवस्थित र संस्थागत रूपमा अगाडि बढाउने विषयमा सार्थक छलफलसमेत भयो।
यस कार्यक्रमको परिकल्पना सानु घिमिरेले गर्नुभएको थियो भने कार्यक्रमका मार्गदर्शक सौरभ किरण रहनु भएको समाचार साहित्यिक पत्रकार महासंघका अध्यक्ष राधेश्याम लेकालीबाट प्राप्त भएको छ ।
