गजल

तुक्काको    याद आउँछ अनि उखानको  याद आउँछ 
जिन्दगीले देखेको त्यो  सुनौलो बिहानको याद आउँछ 


खोइ   के गरिन   होला र मैले मेरो इतिहास जोगाउन 
इतिहासलाई पैसामा गराइएको अवसानको याद आउँछ 


झुपडीले  दिएको कुहिएको  फर्सी र गुन्द्रुक  सम्झँदा 
निगुराको झोलसँग साटेको आत्मसम्मानको याद आउँछ 


मेरो   माटो भन्न   नपाउँदा मेरो   देश भन्न नपाउँदा 
संसारले देख्न नचाहेको मेरो  जन्मस्थानको याद आउँछ 


ती हजारौं सपनाहरु साँचेर एक मुठ्ठी माटो झोलामा हाली 
रुँदै  माटोको सम्झनामा भिजाएको सिरानको याद आउँछ 



धर्मेन्द्र तिम्सिना "क्षितिज"