सुरभिमा पुस्तक लोकार्पण र आख्यान वाचन
काडमाडौँ, १५ भदौ । सुरभि साहित्य प्रतिष्ठानको १६४ औँ आख्यान वाचन कार्यक्रम तथा प्रतिष्ठानका उपाध्यक्ष परशुराम पराशरको लघुकथा सङ्ग्रह ‘सावधान’ लोकार्पण कार्यक्रम सम्पन्न भएको छ । प्रतिष्ठानका अध्यक्ष बाजुराम पौडेलको अध्यक्षतामा सम्पन्न भएको उक्त कार्यक्रममा वरिष्ठ कथाकार तथा पत्रकार विजय चालिसेको प्रमुख आतिथ्य रहेको थियो । साहित्यकार एवं पूर्व राजदूत रमेशप्रसाद खनालको विशिष्ट आतिथ्य रहेको कार्यक्रममा अभिनव साहित्य समाजका उपाध्यक्ष विमल अर्याल, साहित्यकार भगतदास श्रेष्ठ, कथाकार बखतबहादुर थापा, लघुकथाकार खेमराज पोखरेल, समाजसेवी गोपाल बराल, पत्रकार निर्मल अर्याल, मधुसूदन प्रसाद घिमिरे लगायतको आतिथ्यता तथा विशिष्ट साहित्यकार, कथाकार, लघुकथाकारहरू उपस्थिति रहेको थियो ।
प्रतिष्ठानका सदस्य नगेन्द्रप्रसाद भट्टराईको स्वागत मन्तव्यबाट सुरु भएको यो कार्यक्रममा पहिले कथावाचन भएको थियो । दीपक लोहनी, कात्यायन, ऋचा, रमेश भट्टराई पुजारी, खेमराज पोखरेल, मधुसूदन प्रसाद घिमिरे, भारद्वाज मित्र, रामचन्द्र खतिवडा, गङ्गाप्रसाद भेटवाल, गोपाल बराल, शैलेन्द्र श्रेष्ठ, निर्मलरमण पराजुली र लीलाराज दाहालले कथा, लघुकथा र निबन्ध वाचन गरेका थिए ।
दिउँसो १ बजे सुरु भएको यो कार्यक्रमको सञ्चालन प्रतिष्ठानका सचिव अच्युत घिमिरेद्वारा गरिएको कुरा काठमाडौँबाट कथाकार रामकुमार पण्डितले जानकारी दिएका छन् ।
