गीतकार शिवशंकर थापाद्वारा रचित गीतहरुको एकल गीतिसाँझ सम्पन्न
लेखक:खगिन्द्रा खुसी·प्रकाशन मिति: कार्तिक १०, २०८१ ८:४४ PM
आज विर्तामोडमा विशिष्ट गीतकार शिवशंकर थापाद्वारा रचित गीतहरुको एकल प्रस्तुति कार्यक्रम सम्पन्न भएको छ । 'एकमुटु अनेक ढुकढुकी' नाम दिइएको सो कार्यक्रम पूर्वान्चल कलाकार समाजको आयोजनामा सम्पन्न भएको थियो भने यसको संयोजन गायिका मोनिका चुडालद्वारा गरिएको थियो । पूर्वान्चल कलाकार समाजका अध्यक्ष कृष्ण योन्जनको सभाध्यक्षता तथा विशिष्ट गीतकार शिवशंकर थापाको प्रमुख आतिथ्यमा सम्पन्न सो कार्यक्रमको सन्चालन सुनिता तामाङ्गद्वारा गरिएको थियो । विगत ६० वर्ष देखि निरन्तर गीत लेखनका क्षेत्रमा लागिरहनुभएका शिवशंकर थापालाई सम्मान समेत गरिएको सो कार्यक्रममा थापाद्वारा लेखिएका पन्ध्रवटा गीतहरु ख्यातिप्राप्त गायक बलराम समाल, गायक युवराज पोर्तेल, गायिका मेनुका चुडाल, गायिका हेमा भण्डारी, गायक मनिल राईद्वारा गाइएको थियो । आदर्श व्याङ्क्वेट बिर्तामोडको सभाहलमा भरिभराउ दर्शकहरुको माझ गीतकार थापाका गीतहरु गाइएको थियो । गायक गायिकाहरुले गाउनु पूर्व आफ्ना युवा तथा प्रौढ उमेरमा सो गीत लेखनका समयका रमाइला प्रसङ्गहरुलाई उत्साहित अनि भावुक बन्दै गीतकार थापाले सम्झिएपछि ती गीतहरु गाइएका थिए ।
फोटोप्रमुख व्यक्तित्व शिवशंकर थापाद्वारा दीप प्रज्वलन गरेपछि उद्घाटन भएको कार्यक्रममा आशिर्वाद स्वरुप आफ्ना कुराहरु राख्दै आफूले हलो जोत्ने काम तथा अन्य काम नगरी जीवनभर लेख्नेकाम मात्रै गरिरहेकोले आज गीतकार भन्दा खुला मनले स्वीकार गर्न सक्ने भएको धारणा ब्यक्त गर्नु भएको थियो । सभाध्यक्ष कृष्ण योन्जनको धन्यवाद ज्ञापन पछि सुरु भएको सो साङ्गीतिक कार्यक्रममा झापाका अग्रज साहित्यकार केशव आचार्य चन्द्र भण्डारी प्राज्ञ हरि पौडेल प्राज्ञ मुनाराज शेर्मा प्राज्ञ सुमित्रा वाङ्देल चेली विवश बलिभद्र कोइराला दीलिप घिमिरे, देवीचरण भण्डारी, लिला अनमोल, हस्त परियार, सेलिङ के सि लगायत दुईसय बढी स्रष्टा, सर्जक तथा कलाकारहरुको उपस्थिति रहेको थियो । कार्यक्रममा वाद्यवादक विगत तीन दशक देखि निरन्तर किबोर्ड बजाउँदै आएका विमल बुढाथोकी, बासुरी वादक मित्र मगर, गीटार वादक अनिल राजवंशी, तवला वादक सन्देश ढुङ्गाना, अक्टोप्याड वादक मनोज चौधरी तथा गिटार वादक फिरोज रसाइलीलाई समेत सम्मान गरिएको थियो । गीतकार थापाको पहिला नै मुक्तक सङ्ग्रह पाइतालाका डोबहरु प्रकाशित भइसकेको छ । अव आफ्नो आत्मसंस्मरणात्मक कृति प्रकाशन गर्ने तयारीमा रहेका थापाको गीतिसङ्ग्रह समेत प्रकाशनका लागि तयारी रहेको कुरा गीतकार थापाले वताउनु भएको छ ।
ट्यागहरू:
news
samachar
nepalisahitya
टिप्पणीहरू
यहाँ अझै कुनै टिप्पणी छैन। यस पोस्ट सम्बन्धी कुनै टिप्पणी भए माथिको फर्ममा टिप्पणी थप गर्नुहोस
गर्नुहोस्।