गीतकार अगम विकरालको गीत सङ्ग्रह यादको मूच्चर्छना कृति परिचय

गीतकार अगम विकरालको गीत सङ्ग्रह यादको मूच्चर्छना कृति परिचय 

             -प्राज्ञ सुमित्रा बाङ्देल `चेली´ 

कति बाटो छुटिँदै जान्छ कति बाटो भेटिँदै जान्छ
यात्राको नियम यस्तैछ टेकेको पाइला मेटिँदै जान्छ 

मैले कहिले भनें र मेरै पीडा ठूलो छ
 तिम्रो पाउमा फूल छ मेरो शिरमा धुलो छ
 कति माया टुट्दै जान्छ कति माया बुन्दै जान्छ
 माया गर्ने जोडीले आफ्नो कथा भन्दै जान्छ 

मर्नु पलपल नजाती एकपल जिउँनु पो जाती
 मनको दर्द निको पार्ने कोसँग छ ओखती 
 कति घाउ सुक्दै जान्छ कति घाउ पाक्दै जान्छ
 आफ्नो बह सबैले यहाँ कस्लाई कहन्छ
                गीतकार अगम विकरालद्वारा रचित गीत सङ्ग्रह यादको मूच्चर्छना बि.सं.२०८० सालमा प्रकाशित भएको चर्चित कृति भएता पनि भर्खरै पहिचान पुरस्कारकोषद्वारा आयोजित पहिचान पुरस्कार वितरण समारोहमा उपस्थित हुन भोजपुरको चखिया पुग्दा प्राज्ञ चन्द्र रनाहँछाज्यु मार्फत प्राप्त भयो।

  गीतकार अगम विकरालको  अनुभूति  (गीति - एल्बम २०७६)निक्कै चर्चित रहेर वर्ष गीत पुरस्कार - २०७८ प्राप्त गरिसकेको  भने १४४ पृष्ठको  यस सङ्ग्रह भित्र जम्मा १११ वटा रचना समेटिएका छन्।उहाँको रचनाहरुमा मानवीय मूल्य, प्रेम,विकृति विसङ्ती, साँस्कृतिक मूल्य मान्यता,जीवन भोगाइका उकाली ओराली, आरोह अवरोहहरुलाई कलात्मकरुपमा व्यक्त गरिएको पाउन सकिन्छ।

 उहाँका रचनाहरुमा चर्चित गायक/ गायिकाहरु-:शम्भु राई,उदय सोताङ, कृष्णभक्त राई,भिषण मुकारुङ,उत्तममणी बम्जन,रायरा हम्रुङ,श्याम लिम्बु,पवन राई  नाम्दुङ,विश्व शान्त राई, रामकृष्ण श्रेष्ठ,राजकुमार राई, अशोक थुलुङ,समला राई , श्रेया राई,मेलिना राई, सुनिता थेगीम आदिले स्वर दिनु भएको पाइन्छ भने उदय सोताङ,कृष्णभक्त राई, पारस मुकारुङ,दिनेश वान्तवा, चन्द्र रनाहँछा, रायरा हम्रुङ,ताराप्रकाश लिम्बू,श्याम लिम्बु,नुहाङ राई, सन्तोष प्रगाढ,अशोक थुलुङ जस्ता सिद्धहस्त संगीतकारहरुद्वारा संगीतवद्ध गरिएको पाइन्छ।

               

रावासावा प्राज्ञिक समाज नेपाल प्रकाशक रहेको यस कृतिमा अध्यक्ष बम बानियाँको प्रकाशकीय साथै प्राज्ञ श्रवण मुकारुङ,गीतकार संघ नेपालका उपाध्यक्ष रमेश कोइराला,विशिष्ट संगीतकार प्रकाश गुरुङ,नेपाल ललितकला प्रज्ञा प्रतिष्ठान प्राज्ञ सभा सदस्य, चन्द्र रनाहँछाको शुभकामना मन्तव्य रहेको हुँदा कृति ओजपूर्ण रहेको पाउन सकिन्छ।

                        वास्तवमा भन्नु पर्दा यस कृतिको प्रकाशनले  नेपाली  गीति साहित्यको जगमा  एउटा इँटा थपिएकोछ भन्न सकिन्छ।कृति भित्र बाहिर दुरदेशबाट मलाई सम्झिएर कृति उपलब्ध गराउनु हुने  छोरा अगम विकराल साथै काठमाडौंदेखि भोजपुरको चखियासम्म पुस्तक बोकेर हस्तान्तरण गर्नुहुने प्राज्ञ चन्द्र रनाहँछा ज्यु प्रति धन्यवाद आभार व्यक्त गर्न चाहान्छु। गीतकार छोरा अगम विकरालको अक्षरयात्रा अविरल बगिरहोस्।छेमाबाट आशिर्वाद साथै हार्दिक शुभकामना।
                                          दमक, झापा