बितेर गएका मेरा दिनहरूलाई

मेरा दिनहरू
बाँच्दाबाँच्दै विगत भएर गए ।
 बितेर गएका मेरा दिनहरूलाई
 बाँच्दाबाँच्दै विगत भएर
 अधूरै रहेका क्षणहरूलाई
 आफैँसँग बोकिराख्न पाए
 सँगै राख्नमा व्यवधान नआए
 तिनका हिँडाइ सच्याइदिने थिएँ ।
  
 छोडेर गएका मेरा ती दिनहरू
 फर्केर फेरि आउने भए
 तिनलाई मैले सच्याउन पाउने भए
 फेरिदिने थिएँ तिनका अनुहार
 पुछिदिने थिएँ गल्ती र पश्चाताप ।
  
 यत्तिकै खेर गएका मेरा ती दिनहरूलाई
 केही अर्थ दिने थिएँ
 आफ्नो इच्छा अनुरूप
 अघिपछि सारिदिने थिएँ
 आफ्नो अनुकूल पारिदिने थिएँ ।
  
 सबैभन्दा पहिले त म
 गल्तीहरूको फेहरिस्त हेरेर
 अतिसंवेदनशील आफ्नो हृदयलाई
 छातीबाट झिकेर
 कुनै डस्टबिनमा हालिदिने थिएँ
 कतै टाढा लगेर नभेटिने गरी फालिदिने थिएँ ।
  
 आँशुले भिजेका दिनहरूमा
 खुशीको रङ्ग छरिदिने थिएँ
 ठिङ्ग उभिएका दिनहरूका पैतालामा
 नृत्यका तरङ्ग भरिदिने थिएँ
 बाँधिएका सबै दिनहरूलाई
 खुल्ला उडानमा छोडिदिने थिएँ ।
  
 फर्केर फेरि आउने भए यदि
 टाढिएर गएका मेरा ती दिनहरू
 केहीलाई कहिल्यै नसम्झने गरी फिर्ता पठाइदिने थिएँ
 केहीलाई कहिल्यै नछुट्ने गरी छातीमा टाँसिरहने थिएँ ।

 ०००

- सानु शर्मा