शुरभिले १८अौँ वार्षिकोत्सब स्रष्टाहरूलाई पुरस्कृत गरेर मनायो
झापा, माघ १७ । सुरभि साहित्य प्रतिष्ठानले आफ्नो १८ औँ वार्षिकोत्सब स्रष्टाहरूलाई विभिन्न साहित्यिक पुरस्कारहरू समर्पण तथा अभिनन्दन गरेर मनाएको छ । माघ १७ गते शनिवार सम्पन्न कार्यक्रममा प्रतिष्ठानका संरक्षक तथा कथाकार युवराज मैनालीद्वारा लिखित 'पात्र विघटन' लघुकथासङ्ग्रह लोकार्पण समेत गरिएको थियो ।
प्रतिष्ठानका अध्यक्ष बाजुराम पौडेलको सभापतित्व तथा गोकर्णेश्वर नगरपालिकाका प्रमुख दीपककुमार रिसालको प्रमुख आतिथ्यमा सम्पन्न कार्यक्रममा प्रा.डा.खगेन्द्रप्रसाद लुइँटेल, इतिहासविद् प्रा.दिनेशराज पन्त, समालोचक गोपी मैनाली, कृति विश्लेषक कवि महेश प्रसाईं, प्रतिष्ठानका संरक्षक वेदमणि घिमिरे तथा डा.अर्जुनदेव भट्ट लगायतको उपस्थिति रहेको थियोे।
प्रमुख आमन्त्रित व्यक्तित्व मेयर दीपककुमार रिसालले गोकर्णेश्वर नगरपालिकाको वार्षिक नीति तथा कार्यक्रममा साहित्यिक कार्यक्रमहरू समावेश गर्ने गरिएको बताउँदै नगरपालिकाभित्र स्थानीय,राष्ट्रिय साहित्यिक कार्यक्रम हुँदै आएकोमा अब अन्तर्राष्ट्रिय स्तरको साहित्यिक कार्यक्रम गर्ने योजना रहेको बताउँदै हाल नगरपालिकाभित्र १० साहित्यिक संस्थाहरू रहेको र सबै संस्थालाई नगरपालिकाले सहयोग गर्दै आएको बताए।
कार्यक्रमका सभापति तथा प्रतिष्ठानका अध्यक्ष बाजुराम पौडेलले अभिनन्दित तथा पुरस्कृत व्यक्तित्वहरूलाई बधाई दिँदै कार्यक्रममा उपस्थित सबैमा हार्दिक आभार प्रकट गरेका थिए भने अभिनन्दित व्यक्तित्व प्रा.डा.अभि सुवेदी तथा पुरस्कृत व्यक्तित्वहरू खगेन्द्र संग्रौला तथा सुशीला प्रधानाङ्गले मन्तव्य राखेका थिए।
पुस्तकका भूमिका लेखक समेत रहेका समालोचक महेश प्रसाईले लोकार्पित लघुकथाहरूको संक्षेपमा समीक्षात्मक टिप्पणी पेश गरेका थिए। टिप्पणीका क्रममा उनले कथाकार युवराज मैनाली नेपाली लघुकथामा पहिलो खलिल जिब्रान भएको बताउँदै मैनालीका कथाहरू पढ्दा कविता पढे जस्तो लाग्छ भनेर बताए।
मञ्चासिन व्यक्तित्वहरूबाट सामूहिक रूपमा'पात्र विघटन' लघुकथासङ्ग्रह लोकार्पण गरिएको हो। एक सय एक थान लघुकथाहरू रहेको यो कृति युवराज मैनालीको दोस्रो लघु कथासङ्ग्रह हो भने हालसम्म उनका ८ थान कृतिहरू प्रकाशनमा आइसकेका छन्।
कार्यक्रममा मुक्ति गौतम (मणिपुर-आसाम,भारत), ललिता दोषी, महेन्द्र चालिसे, मधुसूदनप्राद घिमिरे र परशुराम पराशरले लघुकथा वाचन गरेर सुनाएका थिए।घिमिरे र पराशरले भने 'पात्र विघटन' पुस्तकबाट लघुकथा वाचन गरेर सुनाएका थिए।
प्रतिष्ठानको गतिविधि तथा पुरस्कारहरूका बारेमा सदस्य वसन्त रिजालले प्रकाश पारेका थिए।
कार्यक्रममा सुलेख साहित्यिक मासिक पत्रिकाको विजय चालिसे स्मृति पनि लोकार्पण गरिएको थियोे भने कथाकार तथा पत्रकार विजय चालिसेको तस्बिरमा फूलमाला चढाई हार्दिक श्रद्धा सुमन अर्पण गरिएको थियोे।
बेँसीगाउँ, ढोल्खाधारोस्थित कृष्ण मन्दिरको प्राङ्गणमा भएको कार्यक्रममा प्रतिष्ठानका सहसचिव मेनुका पोखरेलले स्वागत मन्तव्य राखेकी थिइन् भने कार्यक्रमको सहजीकरण तथा सञ्चालन सचिव अच्युत घिमिरेले गरेका थिए।
