स्रष्टा नृपेश उप्रेतीको ‘आगो रहरको’ गजल सङ्ग्रह सार्वजनिक

झापा २९असोज /नृपेश उप्रेतीकृत गजल संग्रह ‘आगो रहरको’ सार्वजनिक गरिएको छ ।

काठमाडौंको बत्तिसपुतलीस्थित शिल्पी थिएटरमा आयोजित कार्यक्रममा साहित्यकार कृष्णहरी बराल, करुण थापा, लेखक उप्रेतीकी आमा नन्दकुमारी उप्रेती लगायतले गजल संग्रह सार्वजनिक गरेका हुन् ।

कुनै समय नेपालको सञ्चारकर्ममा क्रियाशील उप्रेती हाल बेलायतमा बसोबास गर्दै आएका छन् । विदेशमा बसेर पनि नेपाली साहित्यमा क्रियाशील रहेकामा उप्रेतीको काफी प्रशंसा गरे अतिथीहरुले । लेखक स्वयंले संग्रहमा संग्रहित गजल वाचन गर्दा हल ‘वान्स मोर…’ले गुञ्जायमान भएको थियो ।

‘आगो रहर’ सम्पूर्ण हिसाबले उत्कृष्ट संग्रह रहेको टिप्पणी गर्दै साहित्यकार बरालले सबै गजल गायनयोग्य रहेको बताए । ‘यो संग्रहको सबैभन्दा महत्वपूर्ण पक्ष यसमा भएका सबै गजल गाउन योग्य छन्,’  उनले भने । लेखकको वाचन सुनेर बरालले लेखक स्वयंलाई आफैंले स्वर भर्न सुझाव पनि दिए ।

लेखकसँग तीनदशक अघिदेखिको सम्बन्ध स्मरण गर्दै गीतकार करुण थापाले उप्रेतीलाई कुनै बेलाको जिज्ञाशु पत्रकाकारका रुपमा टिप्पणी गरे । आफूले गजल संग्रह निकाल्ने योजना बनाएको डेढ दशक बिताएको तर, संग्रह निकाल्न नसकेको भन्दै उप्रेतीको गजलप्रतिको लगावको प्रशंसा गरे ।
१५८ गजल संग्रह रहेको उक्त कृति इण्डिगोले प्रकाशन गरेको छ।