नेपाली संस्कृति परिषद्,सिक्किममा´संस्कृति मन्थन´पत्रिकाको विमोचन

झापा १९ फागुन /नेपाली संस्कृति परिषद्, सिक्किमले´संस्कृति मन्थन´सांस्कृतिक पत्रिकाको विमोचन गरेको छ। 

सिक्किम सरकारका शिक्षा मन्त्री  माननीय राजु बस्नेतको प्रमुख आतिथ्यमा मंगलबार पाक्योङमा कार्यक्रम सम्पन्न गरिएको हो। 

कार्यक्रममा विशिष्ट साहित्यकारहरू, सांस्कृतिक अभियन्ताहरू तथा समुदायका सदस्यहरूको उल्लेखनीय उपस्थिति रहेको थियो।
उक्त अवसरमा सांस्कृतिक पत्रिका ´संस्कृति मन्थन´को दोस्रो अंक विमोचन गरिनुका साथै परिषद्को १००औँ मासिक साहित्यिक तथा सांस्कृतिक कार्यक्रम पनि विशेष रूपमा मनाइएको थियो।

नवप्रकाशित पत्रिकाले विभिन्न समुदायहरूको विविधता झल्काउँदै सांस्कृतिक निरन्तरता, साहित्यिक अभिव्यक्ति तथा साझा सम्पदालाई सुदृढ बनाउन युवाहरूको भूमिकाबारे गहन विचार प्रस्तुत गरेको छ।
आफ्नो सम्बोधनमा माननीय मन्त्रीले नेपाली भाषा, साहित्य तथा सांस्कृतिक परम्पराको संरक्षण र प्रवर्द्धनमा परिषद्ले निरन्तर गर्दै आएको प्रयासको प्रशंसा गर्नुभयो।

उहाँले भाषा संरक्षण नै समुदायको संरक्षणको आधार हो भन्ने उल्लेख गर्दै भाषा भित्रै इतिहास, पहिचान,मूल्य र सामूहिक स्मृतिहरू समेटिएको बताउनुभयो। साथै कुनै पनि भाषाको संरक्षणका लागि त्यसको नियमित र सचेत प्रयोग अत्यन्त आवश्यक रहेको उल्लेख गर्दै सबैलाई आफ्नो मातृभाषा दैनिक जीवनमा सकेसम्म बोल्न, लेख्न र प्रवर्द्धन गर्न आग्रह गर्नुभयो।