भाषााविद् तारापति उपाध्यायलाई मरणोपरान्त ‘दरङ गौरव’ सम्मान प्रदान
भारत-असमप्रान्तको दरङ जिल्लाअन्तर्गत मङ्गलदै सहरको ‘सनातन धर्म सभा प्रेक्षागृह’मा गत ९ जुलाई, २०२४ को दिन ‘पञ्चम वार्षिक दरङ दिवस उद्यापन-२०२४’ को आमसभा सम्पन्न भएको छ । सो आमसभामा ‘विशिष्ट मुक्तियोद्धा (स्वाधीनता सङ्ग्रामी) स्वर्गीय टङ्केश्वर शर्मा स्मृति ‘दरङ गौरव’ सम्मान (पहिलोपल्ट) स्वर्गीय गुरुजी तारापति उपाध्यायलाई (मरणोपरान्त) प्रदान गरियो । मरणोपरान्त गुरुजीलाई दिइएको उक्त सम्मान तारापति उपाध्यायकी धर्मपत्नी किरणबाला देवी तथा जेठी बुहारी दुलुमणि देवी उपाध्यायलाई सभाका विशिष्ट व्यक्तिबाट प्रदान गरिएको थियो ।
सभामा दरङ-ओदालगुडी लोकसभाका सांसद दिलीप शइकिया लगायत जिल्लाभरिका गण्यमान्य व्यक्तिहरूको उपस्थिति रहेको थियो। आफ्नो जीवनभर शिक्षा, साहित्य र समाजहितमा काम गरेका उपाध्यायको येगदानको कदर गर्दै सो सम्मान प्रदान गरिएको थियो । सभामा तारापति उपाध्यायको सङ्क्षिप्त जीवनी समेत समावेश गरिएको ‘दरङ प्रभा’ नामक स्मृतिग्रन्थ पनि विमोचन गरियो । तारापति उपाध्याय, नेपाली भाषालाई भारतीय संविधानको आठौँ अनुसूचीमा मान्यता दिलाउने आन्दोलनका एकजना कर्मठ नेतृत्व हुन् । उनले ‘अखिल भारतीय नेपाली भाषा समिति’, ‘असम राज्य शाखा’को अध्यक्ष पद १९८५ देखि १९९२ सम्म सम्हालेका थिए र उनी उक्त समितिको अध्यक्ष भइरहँदा भारतीय संविधानमा नेपाली भाषाले २० अगस्त, १९९२ को दिन मान्यता पाएको थियो । राष्ट्रीय र राज्यिकस्तरमा उनले जातीय हितमा अनेकौँ ऐतिहासिक कार्यहरू गरेका हुन् ।
‘ओदालगुडी उच्चतर माध्यमिक विद्यालय’को ‘अध्यक्ष’ पदबाट अवकाश ग्रहण गरेका तारापति उपाध्यायले सन् २०१० मा ‘साहित्य अकादमी (अनुवाद) पुरस्कार’ प्राप्त गरेका थिए र जीवनको अन्तिम अवस्थासम्म लेखनमा आत्मनियोग गर्ने गुरुजीका जम्मा २६ थान पुस्तकहरू प्रकाशित छन्। उनी ९३ वर्षको परमायु भोग गर्ने योगी तुल्य व्यक्तित्वका धनी थिए । उनी समग्र भारतवर्षमा ‘गुरुजी’ उपनामले चिनिएका र नेपाली, असमिया, बोडो आदि सबै जाति र धर्मावलम्बीहरूबाट आदर प्राप्त गरेका सम्मानित पुरुष भएको कुरा असमका स्रष्टा लक्ष्मण अधिकारीले जानकारी दिएका छन् ।
