‘अमर नेम्वाङ स्मृति साहित्य पुरस्कार’ बाट तीन स्रष्टा सम्मानित हुने

झापा, माघ १९ गते । यस वर्षको ‘अमर नेम्वाङ स्मृति साहित्य पुरस्कार’ तीन जना स्रष्टालाई प्रदान गरिने भएको छ । लेखक साहित्यकार तथा पाँचथरको फाल्गुनन्द गाउँपालिकाका तत्कालीन अध्यक्ष स्वर्गीय अमर नेम्वाङको स्मृतिमा स्थापित ‘अमर नेम्वाङ स्मृति साहित्य पुरस्कार’ बाट निबन्धकार तथा पत्रकार दीपक सापकोटा, कवि देवेन्द्र सोक्तेन र लिम्बू याक्थुङ भाषाका साहित्यकार मलिसा याक्थुम्बालाई सम्मान गर्ने निर्णय गरेको हो । अमर नेम्वाङ स्मृति प्रतिष्ठानका अध्यक्ष मुनिन्द्र नेम्वाङले छनोट समितिले छनोट गरेका ब्यक्तित्वहरुको बारेमा जानकारी दिँदै सातौं संस्करण अन्तर्गतको पुरस्कार वितरण रहेको तथा पुरस्कारस्वरूप प्रत्येक स्रष्टालाई जनही ५० हजार रुपियाँ नगदसहित कदरपत्र प्रदान गरिने कुराको समेत जानकारी दिनुभयो ।

पुरस्कृत सापकोटा कान्तिपुर दैनिकको शनिबारीय परिशिष्ट ‘कोशेली’का संयोजक हुनुहुन्छ । यस्तै कवि सोक्तेन र साहित्यकार याक्थुम्बा मोफसलमा रहेर कविता तथा साहित्यिक लेखनमा सक्रिय रहँदै आउनुभएको छ ।

उक्त पुरस्कार अघिल्लो वर्ष कृष्ण धरावासी, स्वप्निल स्मृति तथा त्यसअघि श्रवण मुकारुङ, प्रेम ओझा, शारदा सुब्बा, बिना थिङ, डा. गोविन्दराज भट्टराई, वीर नेम्वाङ, देवी क्षेत्री दुलाल, मुनाराज शेर्मा, बिमला तुम्खेवा र गिरीराज बास्कोटालाई प्रदान गरिसकिएको छ ।

नेम्वाङको फाल्गुनन्द गाउँपालिकाको अध्यक्ष भएका बेला २०७५ सालमा हृदयघात भएर निधन भएको थियो । पुरस्कार वितरण कार्यक्रमसँगै हरेक वर्ष विद्यार्थीलाई छात्रवृत्ति र विपदमा परेकालाई सहयोग पनि गरिँदै आएको  आयोजकले जानकारी दिएको छ । हरेक वर्ष माघ २६ गते उक्त पुरस्कार वितरण गरिँदै आएको छ ।

सोही कार्यक्रममा बाढी प्रभावित नागरिकलाई राहतसँगै फाल्गुनन्द गाउँपालिकाका सामुदायिक विद्यालयबाट २०८१ सालको एसइई परीक्षामा उत्कृष्ठ नतिजा हासिल गरेका छात्र छात्रालाई छात्रवृत्ती समेत प्रदान गर्ने निर्णय भएको आयोजक स्वर्गीय अमर नेम्वाङ स्मृति प्रतिष्ठानका अध्यक्ष मुनिन्द्र नेम्वाङले बताउनुभयो ।