नयाँ वर्ष २०८२
कविता - नयाँ वर्ष २०८२
उमानाथ दाहाल
घुम्दै यता नूतन वर्ष आयो
वसन्त नै स्वागतमा रमायो
सद्भावना बाँड्न युवा उठेका
आबाल, वृद्धा, वनिता जुटेका
२
धरा, गराले पनि रूप फेरून्
विहङ्ग मीठो उन कण्ठ खोलुन्
नयाँ कलाले भव होस् उज्यालो
बनोस् खरानी तम दुष्ट कालो
३
यो वर्ष जाओस् गरिबी रहेको
धब्बा घमण्डी परहोस् भएको
चम्कोस् धरित्री बनियोस् सितारा
बेमेल होस् मेल र भाइचारा
४
सुकर्ममा चित्त बढोस् अगाडि
आशा उदाउन् नरहुन् पछाडि
यो वर्ष उर्जा थपियोस् विचित्र
होस् विश्व दोस्ती बनियोस् पवित्र
५
प्राणी रहुन् दीप्तक झैँ उज्याला
समाज जागोस् बनियोस् निराला
आरोग्यताले शुभ अङ्कमाल
छाती बनोस् सागर झैँ विशाल
६
आत्मीयता ले जग होस् उज्यालो
गाथा हिमाली बनियोस् दियालो
कुदृष्टिले विश्व यता नहेरून्
उद्योग, व्यापार छ जे नघेरून्
७
प्रभा छरी भास्कर मुस्कुराउन्
सुधांशुले रात मिठो सजाउन्
उम्दा बनुन् कर्म सुचाहना छ
यो वर्ष होस् उत्सव कामना छ ।
