खोलाघरे साहिँलोलाई छन्दकवि पुरस्कार अर्पण तथा कृति विमोचन
मङ्सिर २७/अभिनव साहित्य समाजको २८६ अौं शृङ्खला आज शिव पाञ्चायन मन्दिर ग्रीन हिलसिटी गेट कागेश्वरी मनोहरा-६ मा सम्पन्न भएको छ ।
अभिनव साहित्य समाजका अध्यक्ष गोविन्द घिमिरे वेदमणि सभानायक भएको कार्यक्रममा वरिष्ठ पत्रकार पुरुषोत्तम दाहाल प्रमुख आमन्त्रित रहनु भएको थियोे ।
प्रमुख आमन्त्रित पुरुषोत्तम दाहालले कवि लेखक साहित्यकारहरूले अब देश खोज्ने,देश लेख्ने बेला आएको बताउनुभयो ।
कार्यक्रममा स्रष्टा पदयात्रा नेपालका अध्यक्ष शीतल गिरि,पुरुषोत्तम श्रेष्ठ ,रघुनाथ आचार्य ,शर्मिला तिमिल्सिना,खोलाघरे साहिंलो ,गुणराज आचार्य लगायत विशेष आमन्त्रित अतिथि रहनुभएको थियो ।
कार्यक्रममा स्रष्टा शर्मिला तिमल्सिनाको गजलसङ्ग्रह "रहर जिन्दगीको" को सामुहिक लोकार्पण गरिएको थियो । लोकार्पित कृतिमाथि परशुराम पराशरले छोटो टिप्पणी र केही गजल वाचन गर्नुभयो । शर्मिला तिम्सिनाले धन्यवाद मन्तव्यका साथ सङ्ग्रहभित्रबाट केही गजल वाचन गरेर सुनाउनु भएको थियोे ।
अभिनव साहित्य समाज तथा स्रष्टा पदयात्राका उपाध्यक्ष विमल अर्यालले खोलाघरे साहिंलाको संक्षिप्त परिचय प्रस्तुत गर्नुभयो । पुरस्कृत कवि खोलाघरेले आफ्नो मन्तव्यमा यो पुरस्कारको कदर गर्न प्रयासरत रहिरहने बताउँदै एउटा छन्दोबद्ध कविता सुनाउनुभयो । पुरस्कार कोषका संस्थापक रघुनाथले बधाइ तथा धन्यवाद मन्तव्य दिनुभएको थियो । स्रष्टा पदयात्राका अध्यक्ष शीतल गिरि र गुणराज आचार्यले छोटो शुभकामना मन्तव्य दिनुभयो ।
सभानायक गोविन्द घिमिरे वेदमणिले पुरस्कार कोष सार्वजनिक श्राद्ध हो यो कोषबाट बद्रीनाथ आचार्यलाई धेरैले चिन्न पाएको र रघुनाथ आचार्य ,विमल अर्यालजस्ता कोष व्यवस्थापकहरूको साहित्य प्रवर्द्धनमा ठूलो योगदान रहेको बताउनुभयो ।
कवि वासुदेव पौडेलले खोलाघरेलाई दिएको कवितात्मक शुभकामना वाचन गर्नुभएको थियो ।
कार्यक्रमको सहजकर्ता अभिनवका सहकोषाध्यक्ष शारदा पराजुलीले गर्नुभएको थियो ।
