बिर्तामोडमा ‘पाँचकोरी थुँगा’ को परिचर्चा
झापा ३फागुन /इलामका सङ्गीतकर्मी देवीप्रसाद गौतमको गीत–सङ्ग्रह ‘पाँचकोरी थुँगा’ को परिचर्चा बिर्तामोडमा आइतबार गरिएको छ।
कार्यक्रम साहित्य चौतारीको सभाकक्षमा चौतारीका अध्यक्ष देवीभक्त श्रेष्ठको अध्यक्षता,सुप्रसिद्ध साहित्यकार कृष्ण धराबासीको प्रमुख आतिथ्यमा भएको थियोे ।
चौतारीका सचिव तुलसी निरौलाले सञ्चालन, सल्लाहकार विनोद खनालले स्वागत मन्तव्य तथा अध्यक्ष देवीभक्त श्रेष्ठ र सदस्य मनिषा भट्टराईले स्वागत गीत गाएर सबैलाई स्वागत गर्नुभयो ।
प्रमुख अतिथि तथा मञ्चासिन व्यक्तिहरुबाट कृति ‘पाँचकोरी थुँगा’ लोकार्पण भएपछि साहित्यकार जयनारायण भट्टराईले कृतिकार तथा कृतिको संक्षिप्त परिचयात्मक टिप्पणी गर्नुभयो।त्यसपछि कृतिबारे आफ्नो भनाइ राख्नुभयो कृतिकार देवीप्रसाद गौतमले ।
कार्यक्रममा दुर्गा शर्मा भट्टराई,हस्त परियार,राजेन्द्र सङ्ग्रौला, चन्द्राकुमारी बराल तथा प्रमुख अतिथि कृष्ण धराबासीले शुभकामना मन्तव्य राख्नुभएको थियो
कार्यक्रममा धराबासीले‘पाँचकोरी थुँगा’ले इलामको सांस्कृतिक इतिहासमा नयाँ योगदान थपेको मुल्याङ्कन गर्नुभयाे।संगीत तथा संस्कृतिलाई नयाँ पुस्तामा पुर्नजीवन दिन सक्ने प्रयासका रूपमा पनि उहाँले कृतिको प्रशंसा गर्नुभयाे।
गौतमको यो पहिलो गीत–सङ्ग्रह भए पनि उहाँले २०४५ सालमै रेडियो नेपालमा ‘मन रुने सारङ्गी बज्यो’ गीत रेकर्ड गराइसक्नुभएकाे छ । उहाँकाे राष्ट्रिय तथा लोकगीतहरू रेडियो नेपालमार्फत प्रसारण भइसकेका छन्।आधुनिक, लोकधुन, धार्मिक भावना तथा राष्ट्रिय पहिचानमा आधारित उहाँकाे गीत–सङ्गीतलाई नेपाली संगीतको प्रभावकारी योगदानका रूपमा वक्ताहरूले उल्लेख गर्नुभयाे ।
एक सय गीत समेटिएको यस सङ्ग्रहमा प्रेम, प्रकृति, परम्परा, सांस्कृतिक धुन, लोक भाका तथा जीवनका विभिन्न पक्ष समेटिएका छन्।
सङ्ग्रहमा राई समुदायको ‘साकेला’ र लिम्बू समुदायको ‘केलाङ’ लयसमेत समावेश गरिएको छ, जसले पूर्वी पहाडको सांस्कृतिक विविधतालाई गीतमार्फत उजागर गरेको सहभागीहरूको भनाइ थियो।
कार्यक्रममा स्थानीय साहित्यकार, कलाकार,पत्रकार, सङ्गीतकर्मी तथा सरोकारवालाहरूको उपस्थिति उल्लेखनीय थियो।
