बाह्रखरी कथा प्रतियोगिताका विजेता घोषणा

झापा /‘डिशहोम सातौँ बाह्रखरी कथा प्रतियोगिता, २०८२’ मा शिवराज शाहीद्वारा लिखित ‘एक मान्ठ एक देउता’ शीर्षकको कथा प्रथम भएको छ । 
 प्रथम स्थान हासिल गरेका शाहीले नगद दुई लाख रुपैयाँ पुरस्कार प्राप्त गरेका छन् । 

बाह्रखरी मिडियाद्वारा बिहीबार काठमाडौँमा आयोजित उत्कृष्ट कथा घोषणा समारोहमा प्रधानमन्त्री सुशीला कार्कीले लेखक शाहीलाई नगद, ट्रफीलगायत पुरस्कारबाट सम्मान गरिन् । प्रतियोगितामा ऋतेश गुरुङद्वारा लिखित ‘भुइँकुहिरोको बीचमा’ शीर्षकको कथा द्वितीय भएको छ ।कथाका लेखक गुरुङलाई नगद एकलाख, ट्रफीलगायत पुरस्कारबाट सम्मान गरियो । इन्द्रप्रसाद गोतामे (जगतजंग) द्वारा लिखित ‘अधुरो प्रतिलिपि’ शीर्षकको कथा तृतीय भएको छ । लेखक गोतामेलाई ६० हजार नगदसहित ट्रफीलगायत पुरस्कारबाट सम्मान गरिएको छ । 

उत्कृष्ट २५ भित्रका बाँकी २२ कथाकारहरुमा
चेतनाथ आचार्य, उमेश श्रेष्ठ, शेखर दहित, कृष्णराज सर्वहारी, प्रज्ञा निरौला, सीता पाण्डे,भोगेन्द्र लिङ्देन, हरिबोल काफ्ले, वसन्तबायुङ राई (नाम्दोचा), लक्ष्मण सिटौला, जमुना भट्टराई, अनिता पन्थी, अविनाश भट्टराई, मन्दिरा मधुश्री र अमित घिमिरे रहेका छन् ।
त्यसैगरी, अन्य कथाकारमा टीकाराम पोखरेल, उमा शर्मा, अनिता कोइराला, विष्णु एस राई, दामोदर ढुङ्गेल, प्रकाशकुमार शर्मा र डा. हिमलाल श्रेष्ठका कथा परेका थिए । उनीहरूलाई जनही सात हजार रुपैयाँ   सम्मानस्वरूप प्रदान गरिएको थियो।

निर्णायक समूहका संयोजक अशेष मल्लले राज्यबाट सबैभन्दा हेपिएको विधा कला साहित्य भएको बताएका छन् । कला साहित्य सधैँ राज्यको उपेक्षामा परेको उनको अनुभव छ । तर,बिहीबार बाह्रखरी मिडियाद्वारा काठमाडौंमा आयोजित ‘डिशहोम सातौँ बाह्रखरी कथा प्रतियोगिता, २०८२’ विजेता घोषणा तथा पुरस्कार वितरण समारोहमा मल्लले प्रधानमन्त्री सुशीला कार्कीको उपस्थितिले साहित्यकारहरूले सम्मानित भएको महसुस गरेको बताए ।
यस वर्ष पनि कथा प्रतियोगिताको टाइटल स्पोन्सर डिश होम (डिश मिडिया नेटवर्क लि.)ले गरेको छ भने ‘उत्कृष्ट कथा,२०८२’ को प्रकाशन पार्टनर फाइनप्रिन्ट रहेको छ ।