स्रष्टा महेन्द्र कोइरालाको एकल कविता वाचन कार्यक्रम सम्पन्न

झापा, फागुन ५ । स्रष्टा महेन्द्र कोइरालाको एकल कविता वाचन कार्यक्रम सम्पन्न भएको छ । वि.सं.२०५७-०५८ तिर कान्तिपुर पत्रिकामा  हास्यव्यङ्ग्यात्मक लेखहरुको नियमित स्तम्भ लेखेर लेखनका क्षेत्रमा स्थापित हुनुभएका झापा चन्द्रगढी बजार निवासी कोइरालाले आफूले लेखेका उत्कृष्ट आठ कविता वाचन गर्नुभएको थियो । कोइरालाले वाचन गर्नुभएको कविताको समीक्षा  प्रा.डा.गङ्गाप्रसाद अधिकारीले गर्नुभएको थियो ।

वर्तमान साहित्य प्रतिष्ठानको आयोजनामा फागुनको २ गते  शनिबार प्रेस क्लब भद्रपुरको सभाहलमा सम्पन्न कार्यक्रममा प्रतिष्ठानका अध्यक्ष डिल्लीरमण नेपालको सभाध्यक्षता रहेको थियो भने भद्रपुर नगर कला, साहित्य, संगीत प्रतिष्ठानका अध्यक्ष चिन्तामणी दाहालको प्रमुख आतिथ्यमा सम्पन्न कार्यक्रममा गोपाल  शिवाकोटीले स्वागत मन्तव्य राख्नुभएको थियो । विकाश पाण्डेले सन्चालन गर्नुभएको सो कार्यक्रममा लता खरेलले स्रष्टा परिचय गराउनु भएको थियो । 

    वर्तमान साहित्य प्रतिष्ठानको २८औँ वार्षिक साधारण सभाका अवसरमा आयोजना गरिएको सो कार्यक्रममा  प्रतिष्ठानको नयाँ कार्यसमिति समेत गठन गरिएको थियो । डिल्लीरमण नेपालको अध्यक्षतामा गठन भएको नयाँ कार्यसमितिमा उपाध्क्षमा विकाश पाण्डे, सचिवमा महेन्द्र कोइराला, कोषाध्यक्षमा प्रिया दास र सदस्यहरुमा गोपाल शिवाकोटी, गीता सुवेदी नेपाल र द्रोण अधिकारीलाई सर्वसम्म चयन गरिएको थियो ।