सुकबारे भेलामा सीता पाण्डेको पुस्तक चर्चा

आज झापाको चन्द्रगढीमा चर्चित कवि तथा स्रष्टा सीता पाण्डेको पुस्तकहरुको परिचर्चा गरिएको छ । लेखनाथ पुस्तकालय चन्द्रगढीको सुकबारे भेला अन्तर्गत सम्पन्न भएको उक्त कार्यक्रममा पाण्डेका तीन कृतिहरुको चर्चा गरिएको थियो । कवि, कथाकार, उपन्यासकार पाण्डेको व्यक्तित्व परिचय तथा टुुकुनी खुसी र म कृतिको चर्चा समालोचक तारा विविधद्वारा गरिएको थियो भने वरिष्ठ अधिवक्ता लेखनाथ निरौला र प्रकाश वुढाथोकीले पनि कृति र कृतिकारको चर्चा गर्नु भएको थियो । तारा विविधले व्यक्तित्व परिचयका क्रममा “पाण्डे एक राष्ट्रवादी, अराजकतावादी स्रष्टा भएको तथा चिसोको कविता लेख्नका लागि हिमालमै पुग्ने कवि हुन्‌” भन्ने धारणा व्यक्त गर्नु भएको थियो ।

महेन्द्र कोइरालाले स्वागत मन्तव्य राख्नुभएको सो कार्यक्रममा प्राध्यापक होम सुवेदी, रुद्रगौरी श्री अम्बिका ओली प्रतिष्ठानका अध्यक्ष गङ्गा ओली र प्रमुख अतिथि ओमप्रकाश सरावगीद्वारा मन्तव्य राखिएको थियो भने स्रस्टाहरु दुर्गा सिग्देल, तुलसी भट्टराई केशव आचार्य, राजेश ढुङ्गाना, निर्मला वाँस्तोला,उषा गुरुङ, महेन्द्र भट्टराईले कविता वाचन र देवीचरण भण्डारीद्वारा गीत प्रस्तुत गरिएको थियो । गोविन्द कोईरालाले सन्चालित कार्यक्रम लेखनाथ पुस्तकालयको सभाहलमा सम्पन्न भएको थियो ।