पत्रकार विराट अनुपमको ‘पहिलो आमनिर्वाचन २०१५’ सार्वजनिक

झापा१९फागुन/पत्रकार विराट अनुपमद्वारा लिखित नेपालको पहिलो बहुदलीय संसदीय निर्वाचनको नालीबेली समेटिएको पुस्तक ´पहिलो आमनिर्वाचन २०१५’ मंगलबार राजधानीमा सार्वजनिक गरिएको छ। 

काठमाडौं स्थित उमोजा कफी  सेन्टरमा आयोजित अनौपचारिक कार्यक्रममा पुस्तक विमोचन गरिएको हो।
कार्यक्रममा किताब प्रकाशन प्रा.लि. बुक हिलका सञ्चालक भूपेन्द्र खड्का,प्राध्यापक डा.जगत नेपाल,लेखक विराट अनुपम र शिलापत्रका प्रधानसम्पादक योगेश ढकाल लगायतले पुस्तकबारे धारणा राखेका थिए ।

भूमिकामा डा.नेपालले त्यस समयको राजनीतिक अविश्वास र तनावको प्रसंग उठाउँदै तत्कालीन प्रधानमन्त्री बीपी कोइराला आफूविरुद्ध सम्भावित कदमको त्रासमा रहेको उल्लेख गरेका छन्।
 पुस्तकमा राजा महेन्द्र र बीपीबीचको अविश्वासलाई देखाउने विभिन्न ऐतिहासिक प्रसंग समेटिएका छन्।
लेखक अनुपमले पुस्तकमा पहिलो संसदीय निर्वाचन प्रतिस्पर्धा,मुद्दा,उम्मेदवारको प्रोफाइल र चुनाव चिह्नका हिसाबले आजभन्दा कमजोर नभएको दाबी गरेका छन्। उनले त्यसबेला अपेक्षाकृत युवा सांसदहरूको उल्लेखनीय उपस्थिति रहेको पनि औंल्याएका छन्।

पुस्तकमा १०९ वटै निर्वाचन क्षेत्रका उम्मेदवार,उनीहरूले प्राप्त गरेको मत परिणाम,छ दलका घोषणापत्रको पूर्णपाठ तथा राष्ट्रिय र अन्तर्राष्ट्रिय प्रतिक्रियासमेत समेटिएको छ।
 यसका साथै मतदाता,उम्मेदवार, पत्रकार र बुथ प्रतिनिधिसँगका अन्तर्वार्तामार्फत ‘जीवित इतिहास’ प्रस्तुत गर्ने प्रयास गरिएको लेखकको भनाइ छ।

नेपाली राजनीतिमा चासो राख्ने पाठक,अध्येता र विद्यार्थीका लागि पुस्तक उपयोगी सन्दर्भ सामग्री हुने वक्ताहरूले बताएका छन्।
२८७ पृष्ठको पुस्तकले वि.सं. २०१५ फागुन ७ गतेबाट सुरू भएको नेपालको पहिलो संसदीय निर्वाचनलाई साङ्गोपाङ्गो रूपमा विश्लेषण गरेको छ।